Qazirgi ýaqytta áleýmettik jelidegi paraqshalarda, ıýtýb arnalarda qalyń qaralym jınap, mıllıondaǵan qoldanýshylardy aqparatpen qamtamasyz etip otyratyn blogerlerdiń bási artyp keledi dep jazady Qamshy.kz aqparat agenttigi.

"Óz oıymǵa" ókpe artyp júrgender endi nazaryn basqa baǵytqa bura bastady. Aryn janynyń sadaǵasy etkenderdiń aqparattyq dúmpýi saıabyr taýyp, belden tómen beıádep sózdermen bederlengen baǵdarlamanyń tanymaldylyǵy artyp keledi.

Naqtyraq aıtsaq, Dınara Sátjan júrgizetin "Nemıshlen" ıýtýb arnasy elge bet-álpeti tanymal blogerlerdi, shoý-bıznes ókilderin, sportshylardy qonaq etip, olarmen oıyn oınaý kezinde jynystyq qatynastan  uzamaıtyn dúnıelerdi esh qysylmastan áspettep júr.

Atap aıtsaq, belgili boksshy, memlekettik qyzmet atqaryp júrgen azamat, Olımpıada chempıony da baǵdarlamanyń alǵashqy qonaqtarynyń biri boldy. Baǵdarlamanyń negizgi baǵyty – belgili adamdarmen as mázirin daıyndaý.

Beıneniń sońyna qaraı júrgizýshi qonaǵyna erekshe oıyn týraly usynys jasaıdy. Eger qatysýshy oıyn shartyn oryndaı almasa, oǵan Dınara Sátjannyń arnaıy "jazasy" da joq emes.

Osyndaı soraqy baǵdarlamada sumdyq jazalanǵan tulǵalardyń biri – Serik Sápıev. Dınara hanymnyń fantasıkalyq fılmderdegi bas qaharmandardyń kostúmin kıýden bas tartqan Olımpıada chempıony "Seks-ınstrýktor" degen jazýy bar jeıdeni kıýden bas tartpady. Bul – bir.

Ekinshi soraqy jaǵdaı týraly jelide, ǵalamtorda keńinen aqparat tarap jatyr. Dál osy baǵdarlamaǵa qatysqan Baıan Alagózova oıynǵa kezek kelgende Dınara hanymnyń usynysymen Qaraqat Ábildınaǵa habarlasyp, súıisetin epızody bar kınoǵa usynys jasaıdy. Ádep qaǵıdalaryn buzatyn eń qısynsyz árekettiń biri – telefondaǵy áńgimeniń efırge jazylyp jatqandyǵy.

Belgili prodúser óziniń "túsirmek" kınosyna Qaraqatty qomaqty aqsha usynyp kóndirmekshi bolady. Biraq Qaraqattyń baǵyna oraı, Qudaı ony aýyzdan qaqpady.

Kúlli el bolyp, Láılá Sultanqyzy men Almas Altaıdyń arynyn basa almaı otyrǵanda, Dınara Sátjannyń bul qylyǵy shyndyǵynda "murtqa ókpelep júrgende saqal shyqtynyń" keri boldy.