Jelide DAISH-tyń  sońǵy bes jyldyqta kórinbeı ketken kóshbasshysy Ábý Bakr al-Baǵdadıdiń vıdeosy paıda boldy dep jazady Qamshy.kz aqparat agenttigi.  Bul týraly Twitter jelisinde jıhadshylardyń jazbalaryn qadaǵalap otyratyn SITE Intelligence Group uıymy habarlady.

SITE Intelligence Group dırektory Rıta Kastyń aıtýynsha, bul 2014 jyldyń shilde aıynan bastap DAISH-tyń ál-Baǵdadı bar kadrlardy alǵash jarıalaýy.  Sońǵy ret terorıstik top kóshbasshysy  «Islam memleketi» ózin búkilálemdik halıfat retinde jarıalaǵanda ıraktyq Mosýldaǵy ýaǵyz kezinde el kózine túsken bolatyn.

Sırıada jeńiliske ushyraǵan DAISH ókilderi Shrı-Lankadaǵy jarylysty ósh alýdyń bastamasy dep málimdep, endi álemniń túkpir-túkpirinde osyndaı terrorlyq aktiler bolýy múmkin ekenin alǵa tartqan edi. Osyǵan oraı "Qazaqstan úshin qandaı qaýip bar?" degen suraq tóńireginde dintanýshy Asylbek Snadınnen pikir suraǵan edik.

«Vıdeoúndeýde Abý bakr ál-Baǵdadı DAISH- tyń Baǵýz qalashyǵy mańynda jeńilis tapqanyn moıyndaı otyra, terrorısterdiń áli de «halıfat» úshin kúrestetin anyq aıtady. Jaqynda ǵana Shrı Lankadaǵy bolǵan terrorlyq aktilerdi «Baǵýz» úshin jaýap ekendigin de atap ótedi.
Jalpy búginderi álemdik qaýymdastyq DAISH terorıstik uıymynyń Sırıa jerinde túbegeıli jeńilis tapqanyn aıtyp jatyr. Degenmen bul terorıstik qozǵalystyń kósemi Abý bakr ál-Baǵdadıdiń tiri jáne jıhadshyldyq ıdeıaǵa áli de qyzmet etýge daıyn ekendigin kórý, bul destrýktıvti qozǵalystyń álem úshin áli de úlken qaýip ekendigin aıǵaqtaıdy.

Máselen, keshegi Shrı-Lanka men Aýǵanstannyń Kabýl qalasyndaǵy, keshegi Jańa Zelandıa aımaqtaryndaǵy terrorlyq aktilerdiń tabıǵatyna zer salatyn bolsaq, barlyǵynyń «uıqydaǵy uıashyqtar» arqyly, ıaǵnı, jasyryn jelilerdiń kómegimen júzege asyrylǵandyǵyn baıqaımyz. Bul degenimiz, «jasyryn» uıashyqtardyń áli de ózektiligin bildiredi.

Bizdiń elimizde mundaı «jasyryn» jelilerdiń barlyǵy zalalsyzdandyrylǵanyn eskersek, aldaǵy ýaqytta mundaı «jıhadshyldyq romantıkaǵa» berilgen uıashyqtardyń belsendiliginiń bolýy tehnıkalyq múmkin emes dep aıtýǵa bolady»,-deıdi ol.

Asylbektiń aıtýynsha, vıdeo Sırıanyń shyǵysy, Iraktyń batysynda túsirilgen.

«Dál qazir álemdegi kóptegen sarapshy mamandar Abý bakr ál-Baǵdadıdiń keshegi jasaǵan vıdeoúndeýin qyzý talqylaýda. Alaıda, bir mańyzdy detaldarǵa nazar aýdaryp ketsek, vıdeo jasalǵan geografıalyq lokasıa Sırıanyń shyǵysy, Iraktyń batysynda dep qorytyndy jasaýǵa bolady.
Oǵan sebep:

Birinshiden, vıdeodaǵy adamdardyń bastaryndaǵy «kýfıanyń» oralý ádisi Sırıanyń shyǵysy men Iraktyń batysyndaǵy halyqqa tán, ádette terorıstik uıymdardyń sodyrlary qarapaıym halyqpen sińisip jasyryn júrý úshin jergilikti jerdiń kıim kıý úlgilerin ózderine alyp jatady.
Ekinshiden, atalǵan vıdeodaǵy oryn alǵan jastyqtaǵy órnekter Iraktyń batysynda keńinen taralaǵan oıý bolyp sanalady. Keı aqparat kózderine sensek, mundaı jastyqtar jasalatyn matalar 2013 jyldardan Alepponyń toqyma fabrıkalarynda daıyndalǵan.

Úshinshiden, vıdeoda Abý bakr ál-Baǵdadıdiń jyly kıingenin kóremiz. Al vıdeo-úndeýdiń daıyndalǵan ýaqytyn eskeretin bolsaq, dál osy kúnderi Iraktyń Sınjar jáne Tel-Afar qalalarynyń aýmaǵynda salqyn aýa-raıy bolǵan.

Qyzyq jaıttardyń biri retinde osy vıdeoda saraptaýǵa septigi tıýi múmkin delingen bólme ishindegi detaldardyń birazy matamen jasyrylǵan. Iaǵnı bul degenińiz, sodyrlardyń arnaıy daıyndalǵandyǵyn kórsetedi. Sonda da saraptaýǵa bolatyn detaliniń ózi DAISH-tyń kóseminiń naqty qaıda júrgendigin anyqtap bermese de, belgili bir deńgeıde boljaýǵa bolatynyn anyqtap otyr»,-dep qorytyndylady ol.

 Aıjan Qalıeva