Atalmysh domenniń ıesi Qaırat Almatov Qazaqstannyń astanasymen attas domen nege 25 mıllıon teńge turatynyn túsindirip berdi dep habarlaıdy Qamshy.kz aqparat agenttigi Tengrinews.kz saıtyna silteme jasap.

Qaırat Almatov — frılanser ári baǵdarlama jasaýmen aınalysatyn azamat. Ol bas qalanyń aty ózgergenin estigen boıda Nur-Sultan qalasymen attas domendi 3300 teńgege satyp alǵan. Ózi jarıa etkendeı, Qaırat alǵashynda nursultan.kz degen domendi alǵysy kelgen-mys. Biraq tirkeý saıtynan izdegen ýaqytta, ol domenniń bos emes ekenin kórip, san soǵyp qalypty.

"Men nursultan.kz degen domendi alǵym kelgen. Biraq ol bos emes eken. Sosyn oılana kele defıs qoıylǵan domendi satyp aldym. Artynsha bas qalanyń Nur-Sultan bolyp jazylatynyn estigende qatty qýandym. Men bul kásippen 23-24 jasymda da aınalysqanymyn. Biraq keıin qoıyp ketip edim. Endi meniń teńiz jaǵasynan úı alǵym kelgen armanym oryndalatyn sıaqty", - deıdi atyshýly domenniń 29 jastaǵy ıesi.

Qazaqstan astanasynyń Nur-Sultan dep atalatyny naqtylanǵan ýaqyttan keıin jarty saǵat ótkende Qaıratqa Reseıden bázbireýler habarlasyp, 40 myń dollar, kelesi kúni 60 myń dollar usynypty. Bir aı ishinde atalmysh domendi satyp alý maqsatynda onyń ıesine 30-dan asa adam qońyraý shalǵan.

"Domendi satyp alǵysy keletin qazaqstandyqtar da joq emes. Biraq olar reseılikterge qaraǵanda áldeqaıda az qarajat usynýda. Biraq men ony satýǵa asyqpaımyn. Áli de usynystardy qaraý ústindemin. Bul domen bas qalamen attas bolǵandyqtan, áldeqaıda qymbat turýy tıis. Eger qazaqstandyqtar men qalaǵan qarajatty usynbasa, ony sheteldikterge satatyn shyǵarmyn", - deıdi Qaırat Almatov.

Domen ıesi óziniń qolyndaǵy dúnıesiniń eń qymbat domen retinde tarıhta qalǵanyn qalaıtynyn jasyrmady. Birshama ýaqyt buryn atalmysh domenniń 24 mıllıon teńgege elektrondy satylymǵa shyqqany jarıa bolǵan.

3300 teńgelik domen ózin 25 mıllıon teńgege satyp alatyn ıesin izdeý ústinde. Iesi de teńiz jaǵasynan úı alýǵa asyǵyp otyrǵan kórinedi.

Aýdarǵan: Ádilet Mádenıet