Ulttyq banktiń esebine sáıkes, Qazaqstanda 5 mıllıon adamnyń kredıti bar dep habarlaıdy Qamshy.kz aqparat agenttigi sputniknews.kz saıtyna silteme jasap. Azamattardyń tutynýshylyq kredıtter boıynsha jalpy qaryzy 4 trıllıon teńgeden asyp ketken.

QR Ulttyq bank tóraǵasynyń orynbasary Oleg Smolákovtyń aıtýynsha, búginde onlaın kredıt beretin uıymdar kóp. Atalǵan qurylymdar kóp jaǵdaıda halyqqa jalaqyǵa deıin aqshany qaryzǵa alýdy usynady. Ondaı shaǵyn nesıelerdiń mólsherlemesi de tym joǵary. Sonyń saldarynan adamdar qaryzǵa belshesinen batyp, aqshany qaıtara almaı jatady. Onlaın kredıtorlar bolsa, birqatar shekteýge qaramastan óz qyzmetterin jalǵastyra beredi. Osyǵan baılanysty arnaıy zań jobasy aıasynda jańa júıeni engizý josparlanyp otyr.

"Birinshiden, qaryzdy qaıtarý merzimi ótip ketken azamattarǵa kredıt berilmeıdi. Máselen, kredıt alǵan adamnyń aqshany qaıtarý merzimi 60 kúnnen asyp ketse, oǵan qosymsha kredıt rásimdelmeıdi. Óıtkeni keıbir adamdar birinshi kredıtti jabý úshin taǵy kredıt alyp jatady. Ekinshiden, kredıt somasynyń shekti mólsheri bolady. Qaryzdyń somasyn arttyrýǵa múmkindik berilmeıdi. Áıtpese, artynan ondaı kredıtti óteý qıynǵa túsedi", - dedi O.Smolákov qarjy naryǵy men mıkroqarjylandyrý qyzmetin retteý boıynsha keıbir zańnamalyq aktilerge ózgerister men tolyqtyrýlar engizý týraly zań jobasyn tanystyrý rásiminde.

Onyń aıtýynsha, jalaqyǵa deıin beriletin nesıelerdiń mólsherlemesi de tym kóp.

"Osyǵan baılanysty qaıtarylatyn aqshanyń shekti mólsheri bolady. Máselen, bir kredıtti qaıtarý somasy barlyq aıyppul men mólsherlemeni qosa sanaǵanda sol kredıttiń eki eselik mólsherinen aspaýy tıis", - dep atap ótti ulttyq bank tóraǵasynyń orynbasary.

Usynǵan: Dáýren Sybanbaı