Keshe, ıaǵnı, 14-mamyr kúni Nur-Sultan - Petropavl tas jolynda 11 oqýshy men bir eresek adam sapar shekken shaǵyn avtobýs órtke orandy. Shaǵyn ekıpajben birge júrgen polısıa qyzmetkerleri balalardy kólik ishinen alyp shyǵyp, kólik júrgizýshisimen birge órtti sóndirýge tyrysty dep habarlaıdy Qamshy.kz aqparat agenttigi NewTimes.kz agenttigine silteme jasaı otyryp.

Jeldiń saldarynan órt órship ketkendikten, polısıa qyzmetkerleri júrgizýshimen qosylyp, kólikti joldyń shetine ysyryp tastady.

Shaǵyn avtobýs órti 14-mamyr kúni saǵat 17:10 shamasynda Soltústik Qazaqstan oblysynyń Taıynsha aýdany Roshchınsk aýylynyń mańynda boldy.

"Qozǵaltqyshtan shyqqan tútindi sezgen júrgizýshi jol boıyna toqtap, qaýiptiń aldyn aldy. Kilt toqtaǵan GAZel kóliginiń artynsha oblystyq İİB ekıpajynyń qyzmetkerleri polısıa leıtenanty Jiger Baltabaı men aǵa polkovnık Batyrhan Moldanjanov ta kólikterin tejegen. Balalardy shaǵyn avtobýstan shyǵaryp bolǵan soń, órt sóndirýshilerdi shaqyryp, barlyǵy birge jolaýshylardy zalalsyzdandyrýǵa tyrysty. Qabyldanǵan sharalardyń nátıjesinde eshkim jaraqat almady",- dedi QR İİM-niń resmı ókili Nurdilda Oraz.

Soltústik Qazaqstan oblysy Tótenshe jaǵdaılar departamentiniń habarlaýynsha, oqıǵa ornyna 37 shaqyrym jerde ornalasqan Kellerovka kenti №17 órt sóndirý bólimshesiniń kezekshi kúzeti kelip jetken. 17:53-te kólik tolyǵymen janyp bitti.

"Órt bolǵan oryndy tolyǵymen tazarttyq. Qurban bolǵandar men zardap shekkender joq. Órt shyqqan sebep - qozǵaltqysh bólimindegi elektr symdarynyń qysqa tuıyqtalýy",- dep málimdedi tótenshe jaǵdaılar departamenti.

Roshchınsk kentinen taǵy bir kólik aldyryp, polısıa qyzmetkerleri balalardy otbasyna aman-esen jetkizdi.

Aýdarǵan: Bek Baıtas