Adam ómiri – kez-kelgen pende úshin eń basty ári óte qundy syı. Ony gúldendirý men qaıǵy-muńǵa toltyrý, qýanyshqa keneltý men jaǵymsyz kóńil kúıge batyrý árkimniń óz qolynda. Eger jaqsy ómir súrgińiz kelse, ómirińizdiń ár sátinen lázzat alǵyńyz kelse, onda birshama dúnıelerdi ózgertýińizge týra keledi. Ol qandaı dúnıeler? Biz sizge búgin osy jaıynda shama-sharqymyzsha keńes bermekpiz. Endeshe, ári qaraı oqyńyz.

Sizdiń árbir kúnińiz bir-birine uqsaı ma? Ýaqytyńyzdyń zaıa ketip jatqanyn ishteı sezesiz be? Eger "ıá" dep jaýap bere alsańyz, qazirden bastap ózińizben jumys jasaǵanyńyz jón. Óıtkeni, siz ómirdi bir ret qana súresiz. Al qamshynyń sabyndaı qysqa ýaqytta sizge qaıǵy-muńǵa, qıynshylyqtan taryǵýǵa ýaqyt bolmaýy tıis. Barlyǵyn júregińizge jaqyn qabyldamaı, aqylǵa súıene otyryp, sheshe bilgenińiz abzal.

Mysaly, eger jumysyńyzda basshyńyz aılyq esepti qazir talap etse, ne isteısiz? Emtıhan ýaqyty keldi. Biraq stýdent turaqty sabaqqa qatysyp júrse de, suraqtardyń jaýabyn tappaı qalady. Ne istemek kerek? Bular – jastar arasynda eń jıi kezdesetin ári tyǵyryqqa tireıtin sebepterdiń biregeıleri. Bul qatarǵa kóptegen mysaldardy tirkeı berýge ábden bolady.

Búgingi maqalamyzda jastardy, jalpy adamdardy tyǵyryqqa tirep, qamyǵý jaǵdaıyna alyp keletin birneshe sebepterdi atap ótkeli otyrmyz.

Siz bireýge renjý arqyly óz ómirińizdiń shyrqyn buzasyz

Adam men adamnyń renjisýi, ókpege boı aldyrýy jıi kezdesetin jaıt. Siz bireýge renjý arqyly ózińizge jaǵymsyz kóńil kúı syılaısyz. Al bul kóńil kúı sizdiń jaıdary júrýińizge, qalaǵan isińizben aınalysyp, odan lázzat alýǵa kedergi jasaıdy.

Siz eshkimdi keshire almaısyz jáne bireýge renji arqyly ol adamdy ózińizge qaıtaramyn dep oılaısyz. Bul – óte qate pikir. Ǵumyryńyzdyń belgili bir ýaqytyn renishke jumsaý – aqymaqtyq. Árıne, kez-kelgen adamda kóńil qalý syndy jaǵdaı kezdesedi. Biraq ony ashyq sóılesý arqyly jeńip ketken abzal.

Ózińizge unamaıtyn jumyspen aınalysý

Kez-kelgen adam balasynda óziniń jan dúnıesi qalaıtyn qyzmeti bolady. Ol adam sol ispen aınalysý arqyly jan rahatyn sezinedi jáne ómirden lázzat alady.

Qazirgi ýaqytta aptanyń alty kúnin ózine unamaıtyn qyzmetke jumsap, basshydan urys estip ári qulyqsyz qyzmet etip, bir aı ómir súretin jalaqyǵa jumys jasaıtyndardy kóptep keziktirýge bolady.

Eń durysy – ózińizge unaıtyn jumyspen aınalysyńyz. Sol ýaqytta sizdiń eńbek ónimdiligińiz de joǵary bolmaq.

Ózge pikirlermen sanasý

"Álemde qansha adam bolsa, sonsha pikir bar" degen qaǵıdany estigen bolarsyz. Ózgelerdiń pikirimen ómir súretinder úshin ár isinen lázzat alý qıynǵa soǵatyny anyq.

Siz "Bul áreketime basqalar ne deıdi? Eger ózgelerge unamaı qalsa, qaıtemin?" degen suraqty qoıasyz ba?

Bul suraq adamdardy óz qalaýyndaǵy nársemen aınalysýdan shekteıdi. Sondyqtan, osyndaı ádetińiz bolsa, erterek doǵarǵanyńyz jón bolmaq.

Densaýlyq – birinshi baılyq

Deni saý adamda ór rýh bolady. Siz, árıne, tańerteń uıqydan turǵanda jasalatyn jattyǵýlardy taptaýryn áreket dep oılaısyz. Nemese bir mezgil keshkilik júgirýge erinesiz.

Degenmen, dene saýlyǵy – jan saýlyǵy. Sizdi aýrý meńdegen kezde ǵana barlyǵyn túsine bastaısyz.

Durysy – sportshyǵa aınalmasańyz da, jeńil jattyǵýlardy oryndap, bir mezgil júgirip turý.

Shaǵym men ókinish – qajetsiz dúnıeler

Siz kún saıyn ózińizge qatysty túrli nárselerge shaǵymdanasyz. Sizdiń shaǵym kitapshańyz qazirgi ýaqytta 5 tomdyq kitap sekildi kórinýi múmkin. Ómir súrińiz. Ár nársege shaǵym jasaǵannan, eshteńe ózgermeıtinin túsinińiz.

Sonymen qatar, kún saıyn ózińizge esep berer kezde kúndiz aıtqan sózderińizge, jasaǵan qylyqtaryńyzǵa, jasaý qajet edi degen oılaryńyzǵa ókinish bildirip jatasyz. Esińizde bolsyn, ótkenge ókiný – ýaqyt joǵaltýǵa da turmaıtyn dúnıe. Ótkennen tek qana sabaq alyńyz.

Mahabbatsyz eshqandaı áreketke barmańyz

Qazaqta "Jar tańdaýda qatelikke boı aldyrmaý qajet" degen sóz bar. Tańdaǵan jaryń – sizdiń otbasylyq ómirińizge, aldaǵy barlyq ǵumyryńyzǵa áser etetin jan. Sondyqtan, baqytty otbasyny qalasańyz, mahabbatpen shańyraq kóterýge umtylyńyz.

Salystyrý – eshqandaı paıda ákelmeıtin áreket

Kez-kelgen adam ózin bireýmen salystyrǵandy jaqsy kóredi. Sondaı-aq, ózgelerden ózin tómen sezinse, soǵan ishi kúıip, ózin eshkimge qajetsiz ári básekege qabiletsiz, eńbekke qyry joq adam retinde esepteıdi.

Esińizde bolsyn, siz – ózińiz úshin eń qymbat adamsyz. Ózińizben jumys jasaý arqyly álgi salystyrǵan adamǵa ońaı jetýge ábden bolady.

Kólik jetken jerge jylqymen de jetýge bolatynyn umytpaǵanyńyz abzal. Tek qana artyq eńbek etý men alǵa umtylys tolastamaýy tıis. Bul – salystyrǵan adamǵa ıyq tirestirer joldaǵy eń basty qaǵıdalar.

Baqyt aqshada emes

Baqyt degen úlken uǵymnyń qunyn kók qaǵazben ólsheý – ábestik. Materıaldyq jaǵdaı jaqsy ómir súrýge áser etkenimen, barlyǵyn sheshe bermeıdi.

Oılańyzshy, ómirde aıyna 6 mıllıon teńge tapsa da, shańyraǵynan baqyt ıisi sezilmeıtin adamdar bar. Al kúzetshi nemese aýla sypyrýshy bolyp qyzmet etip, 60 myń teńge jalaqymen baqytty kún keship jatqandar da bar.

Siz úshin aqsha eń basty qundylyq bolyp eseptelmeýin qadaǵalańyz. Eger de áli sondaı pikirde bolsańyz, ony erterek ózgertken abzal. Bul qate baǵyt, qate pikir ekenin eskerińiz.

Alǵys aıta bilý – adamshylyq belgisi

Siz ózińizge qol kómegin usynǵan adamdarǵa, qyzmetińizdiń sapaly bolýyna kómektesken adamdarǵa quddy barlyǵy solaı bolýy tıis sekildi alǵys aıtpaýyńyz múmkin. Tipti, Qudaıǵa da ózińizde bar nárseler úshin, qundylyqtaryńyz úshin alǵys, táýbe bildirmeýińiz múmkin.

"Rahmet!" degen sózdi aıta bilý – kishipeıildiktiń belgisi. Eger siz adamdyqtan alshaqtamasańyz, boıyńyzda kishipeıildik saqtalyp qalady.

Al adam bolyp, qorshaǵan ortanyń jylýyn sezinip ómir súre bilý – naǵyz ómir súrýdiń kórinisi. Eshqandaı adam máńgilik emes. Zamandas bolyp, kún keship jatqannan keıin qaıyrymdy, meıirimdi bolǵan abzal. Ór kókirektik syndy minez, daǵdylardy shetke ysyryp tastaý qajet.

Ótirik órge baspaıdy

Ótirik aıtý – kóp adamnyń boıynda kezdesetin ári óte nashar qasıet. Ótirik sóz arqyly, jalǵan is arqyly elder men qalalardy qurdymǵa jiberýge nemese kerisinshe qurýǵa bolady. Ótiriktiń qudireti óte joǵary.

Jaqsy is úshin, durys baǵyttaǵy qajettilik úshin ótirik aıtý degen uǵym bar. Bul ótirikti kópshiligi aqtap, óz isin sol arnaǵa syıǵyzýǵa umtylady. Degenmen, ótiriktiń aty – ótirik.

Ótirik aıtý arqyly adamdardyń sizge degen ystyq yqylasyn, mahabbatyn, oń kózqarasyn qurtýyńyz múmkin.

Lajy kelse, ótirikten boıdy aýlaq salyp, shynaıy ómir súrýge tyrysqan abzal. Ómir – ótirik aıtatyn oryn emes, shynaıylyqpen taza júretin oryn.

Ýaıym – berekeńdi qashyratyn ádet

Árıne, adam bolǵan soń, mıyń ádettegideı jaramdy qyzmet etip turǵan soń, oıǵa, ýaıymǵa boı aldyrmaý áste múmkin emes. Degenmen, bolardy da, bolmasty da ýaıymdaı berý – túkke turǵysyz ári paıdasy joq áreket.

Ýaım-qaıǵyǵa boı aldyrý arqyly siz óz psıhologıańyzdy lastap, ómirge degen qushtarlyǵyńyzdy joǵaltasyz. Adamdardyń barlyǵynda pragmatıstik kózqaras, durys qadamǵa degen batyl umtylys bolýy qajet.

"Kim táýekel etpeıdi, sol maqsatyna jetpeıdi" degen sóz bar. Sondyqtan, ótkendi de, kelerdi de shamadan tys oılap, sary ýaıymǵa boı aldyrǵannan eshteńe ónbeıdi.

Baqytty ǵumyr keshý úshin qajetsiz ádetterden qazirden bastap arylǵanyńyz jón.