Ekonomıkalyq tergeý departamentiniń qyzmetkerleri jyl basynan beri 35 qylmystyq isti tergep, sotqa jiberdi, dep habarlaıdy Qamshy.kz aqparat agenttigi  «Habar 24»  tilshisine silteme jasap.

Byltyr Petropavl qalasynyń Jambyl Jabaev kóshesiniń jaryqtandyrý júıesin jańartýǵa 230 mln teńge jumsalǵan. Alaıda Ekonomıkalyq tergeý departamentiniń qyzmetkerleri onyń 44 mıllıonyn eseptep shyǵara almaǵan.

«44 mln-nyń ishindegi 21 mıllıonyna jobalyq-smetalyq qujattarda ornatylýy tıis quraldardyń ornyna basqa quraldar ornatylǵan. Baǵasy tómen. Ol – 21 mln. Qalǵan somaǵa istelýi tıis jumystar istelmegen», - dedi oblystyq Ekonomıkalyq tergeý departamentiniń bastyǵy Nurymjan Abatov.

Al Petropavl halyqaralyq áýejaıy Qazaqstan men Reseıdiń 15-aımaqaralyq yntymaqtastyq forýmy qarsańynda kúrdeli jóndeýden ótken bolatyn. Bul maqsatqa el qazynasynan 1,1 mlrd teńge bólindi. Biraq qarjynyń bir bóligi qoldy bolǵan. Naqtyraq aıtsaq, 68 mln teńge joq. Bul aqshaǵa qujatta kórsetilgen qondyrǵylar qoıylmaǵan. Osy jaıtqa baılanysty kásipkerler tekserýshi táýelsiz sarapshylarǵa para beremiz dep ustaldy. Olar máseleni ońtaıly sheshý úshin 500 myń teńge usynǵan.

Eki kásipker memleketke 68 mln teńge qaıtaryp berdi. Sotta olardyń kinási dáleldenip, árqaısysy 6 jyl shartty túrde jaza aldy. 

Bıyl Ekonomıkalyq tergeý departamentimen tergelgen qylmystyq isterdiń sotqa jetýi 20%-ǵa artyp otyr.

Usynǵan: Marjan Sábet