Memleket basshysy Han Chjenniń Qazaqstanǵa sapary ekijaqty saýda-ekonomıkalyq qatynastardy nyǵaıtýǵa septigin tıgizetinine senim bildirdi dep habarlaıdy Qamshy.kz aqparat agenttigi Aqordaǵa tikeleı silteme jasap.

Qazaqstan Prezıdenti Han Chjendi «Bir beldeý, bir jol» forýmynyń tabysty ótýimen quttyqtap, Sı Szınpınniń Uly Jibek jolyn jańǵyrtý ıdeıasy halyqaralyq qoǵamdastyq tarapynan qoldaý tapqanyn jáne óziniń ómirsheńdigin dáleldegenin atap ótti.

Qasym-Jomart Toqaev Elbasy Nursultan Nazarbaev pen QHR Tóraǵasynyń jaqynda ótken kezdesýinde qol jetkizgen ýaǵdalastyqtar eki el arasyndaǵy jan-jaqty strategıalyq seriktestikti nyǵaıtý jolyndaǵy mańyzdy qadam bolǵanyn aıtty.

– Qytaımen tatý qarym-qatynas ornatý Qazaqstannyń syrtqy saıasatyndaǵy eń mańyzdy basymdyqtardyń biri. Eki el arasyndaǵy saıası, saýda-ekonomıkalyq jáne mádenı-gýmanıtarlyq baılanystar ózara paıdaly ári tıimdi memleketaralyq yqpaldastyqtyń úlgisin kórsetedi. Qytaı – Qazaqstannyń iri syrtqy saýda áriptesi. Ekijaqty saýda-sattyqtyń aýqymy qarqyndy ósip keledi, – dedi Memleket basshysy.

QHR Memlekettik keńesi Premeriniń orynbasary Qazaqstanǵa alǵash ret saparmen kelgenin atap ótip, bizdiń elimizdiń jaqsy áser qaldyrǵanyn aıtty. 

– Qazaqstan táýelsizdik jyldary turaqty damyp keledi. El ekonomıkasy ósýde. Ózara qarym-qatynastarymyzdyń damyǵanyna rızashylyq bildiremiz, – dedi Han Chjen.

Kezdesý barysynda Qazaqstan-Qytaı birlesken jobalaryn júzege asyrý, Qazaqstan aýyl sharýashylyǵynyń organıkalyq ónimderi eksportynyń  kólemin arttyrý, transshekaralyq ózenderdi paıdalaný jáne týrızmdi damytý máseleleri qarastyryldy.

Kólik-logıstıkalyq saladaǵy yntymaqtastyqqa erekshe kóńil bólindi. Sonyń ishinde, Lánúngan portyndaǵy birlesken termınaldyń jáne arnaıy ekonomıkalyq aımaqtaǵy «Qorǵas – Shyǵys qaqpasy» qurǵaq portynyń áleýetin paıdalaný, tranzıtti konteınerlerdiń tasymal kólemin arttyrý  perspektıvalary talqylandy.