Atyraý oblysynyń ákimi Nurlan Noǵaev bilim berý basqarmasynyń basshylyǵyna muǵalimderdi jumysqa tartý boıynsha jumysty kúsheıtýdi tapsyrdy. Búgingi kúnge deıin oqý oryndarynda 472 ustaz tapshy. Negizinen, orys tildi mektepterde.

- Biz osy saýal boıynsha jumystanýdamyz. Oblystyń birqatar oqý oryndaryn araladyq. Bıylǵy jyly 174 jas maman keledi dep josparlanýda,- dep naqtylady Atyraý oblystyq bilim berý basqarmasy basshysynyń mindetin atqarýshy Jansulý Tóremuratova.

Óńir basshysy Nurlan Noǵaev maman tapshylyǵy jaǵdaıynda Qazaqstannyń ózge oblystarynan tájirıbeli pedagogtardy shaqyrtý kerektigin aıtty.

- Qajetti mamandardy bizdiń óńirimizge shaqyryńyzdar. Biz olarǵa barlyq jaǵdaıdy jasap, úımen qamtamasyz etýge daıynbyz. Bul mektep dırektorlaryna da qatysty. Konkýrs jarıalap, tájirıbeli maman qoıyńdar. Eshkim sizderge kedergi keltirip, qarsy tura almaıdy,- dep atap ótti aımaq basshysy.

Sondaı-aq, oblys ákimi aıta ketkendeı, maman izdeý jumysyn tek bilim berý basqarmasy ǵana iske asyrmaı, barlyq deńgeıdegi ákimder de júzege asyrýy tıis. Osyndaı jaǵdaıda ǵana másele óz sheshimin tabatyn bolady. Budan basqa, aımaq basshysy oqý oryndaryndaǵy jóndeý jumystaryn óz ýaqytynda aıaqtaýdy tapsyryp, jumystardyń júrgizilýi oqý prosesine kedergi keltirmeý kerektigin aıtty. Jazǵy demalys taqyryby da qozǵaldy, Nurlan Noǵaev oqý lagerlerin balalarǵa tabıǵı qolaıly jaǵdaı jasalǵan jerlerde ótkizýdi tapsyrdy.