Atyraý oblysynyń ákimi Nurlan Noǵaev bilim berý salasy qyzmetkerlerimen ótkizgen jınalysta: - Mektep dırektorlary memlekettik satyp alýdyń qıyn rásimderine qatysýdyń ornyna óz mindetterin atqarýlary tıis , - dedi.

Nurlan Noǵaev mektep dırektorlaryn bul proseske qatystyrmaı, memlekettik satyp alý rásimderin júıelendirýdi jáne ortalyqtandyrýdy tapsyrdy.

-Mektep dırektorlary óz quzyretterindegi máselelermen ǵana aınalysýlary kerek. Memlekettik satyp alý rásimderine qatysýǵa mindetti emes jáne bul jumysty ortalyqtandyrý qajet. Memlekettik satyp alý salasyn durys bilmegendikten, mektepterde qatelikter ketedi, sonyń kesirinen sapasyz taýarlar alynyp jatady, al ol oqý prosesine keri áserin tıgizedi. Basqa da problemalar bar. Ár mektep ystyq tamaq jetkizýshini ózi anyqtaıdy, sondyqtan bilim berý mekemelerinde as máziri ár túrli. Ata-analar tarapynan shaǵymdar bar. Ortalyqtandyrý arqyly osy jaǵdaıdy túzeýge bolady, - dep atap ótti Nurlan Noǵaev.

Oblys ákiminiń birinshi orynbasary Serik Shapkenov bul baǵyttaǵy jumystar júrip jatqanyn aıtty. Jaqyn ýaqytta mektep dırektorlary memlekettik satyp alý máselelerimen aınalyspaıtyn bolady, sondaı-aq, býhgalterlik esepti ortalyqtandyrý josparlanyp otyr.

-Qazir bárine sıfrlyq úlgide qarap otyrýǵa bolady. Bári anyq, qoljetimdi kórsetiletin baǵdarlama qurý kerek. Ár oqytýshy óziniń qansha jumys istep, qandaı eńbekaqy alatynyn kórip otyrýy tıis. Sol kezde qyzmetkerlerdiń oqý saǵattaryna aqy tóleý tóńiregindegi saýaldary men talaptary bolmaıdy,-dedi Nurlan Noǵaev.