Halyqaralyq Olımpıada Komıtetiniń basshysy, doktor Tomas Bah Qazaqstan UOK prezıdenti Tımýr Qulybaevqa hat joldap, ony qoǵammen baılanys jáne sport arqyly áleýmettik damý jónindegi (Public Affairs and Social Development through Sport Commission, PASD) HOK Komısıasynyń múshesi atanýymen quttyqtady, dep habarlaıdy Qamshy.kz aqparat agenttigi Ulttyq Olımpıada komıtetiniń baspasóz qyzmetine silteme jasap.
«Sizdi PASD komısıasynyń múshesi etip taǵaıyndaǵanyma qýanyshtymyn. Sizge áriptestigińiz úshin alǵys aıta otyryp, jaqyn arada kezdesetinimizge senimdimin» delingen hatta.
Atalǵan komısıa buǵan deıin halyqaralyq qatynastar jónindegi Komısıa dep atalatyn. PASD negizgi mindetteri qataryna HOK sesıalaryn ótkizý, uıymnyń atqarýshy komıteti men HOK prezıdentine álemdegi Sport pen Olımpızm rólin damytý strategıalaryn túsindirý, Olımpıadalyq qozǵalysty damytý, BUU jáne Olımpıadalyq oıyndardan bólek ózge de uıymdarmen baılanys ornatý jóninde keńes berý jatady.
Komısıa quramyna HOK Atqarýshy komıtetiniń músheleri, UOK basshylary, halyqaralyq federasıalar men sporttyq uıym jetekshileri kiredi. Atap aıtar bolsaq, Halyqaralyq jeńil atletıkalyq federasıalar Qaýymdastyǵynyń IAAF basshysy Sebastán Koe men Halyqaralyq trıatlon federasıasynyń ITU prezıdenti Marısol Kasado jáne taǵy basqa da tanymal sport tulǵalary. Komısıaǵa HOK múshesi ári Amerıkaaralyq damý bankiniń basshysy, Búkilálemdik ekonomıkalyq forým Qory basqarmasynyń múshesi, kolýmbıalyq Moreno Lýıs Alberto jetekshilik etedi.
Qazaqstan UOK basshysy 24 mamyr kúni Lozannada (Shveısarıa) ótetin Ulttyq Olımpıadalyq komıtetter Qaýymdastyǵy (UOKQ) atqarýshy komıtetiniń 78-shi otyrysyna qatysady dep josparlanýda.
Eske sala keteıik, byltyr jyl sońynda ótken UOKQ Bas Assambleıasynyń otyrysynda T. Qulybaevty 2022 jylǵa deıingi UOKQ Atqarýshy komıtetiniń múshesi etip taǵaıyndaǵan bolatyn. Úmitkerler álemdegi barlyq 206 UOK arasynan qarastyryldy. Atqarýshy komıtet quramyna qurlyqtyq qaýymdastyqtar usynǵan 24 mańyzdy sporttyq fýnksıoner engen bolatyn. Sondaı-aq, Tımýr Qulybaev Azıa Olımpıadalyq Keńesiniń vıse-prezıdenti. Ol osy qyzmetine bıylǵy mamyrda qaıta taǵaıyndaldy.
Usynǵan: Marjan Sábet
