Soǵys soıqany bolyp jatqan Sırıada áli kúnge deıin 300 qazaqstandyq qalyp otyr. Olardyń ishinde 170 bala bar. Bul týraly Qazaqstannyń UQK basshysy Baqytbek Rahymberdıev málimdeme jasady dep habarlaıdy Qamshy.kz aqparat agenttigi.

"Er adamdar, áıelder jáne balalardy qosqanda, áli kúnge deıin Sırıa jerinde 300 qazaqstandyq júr", - dedi Rahymberdıev dúısenbi kúni Nur-Sultan qalasynda ótken brıfıńte.

Tuńǵysh prezıdent bastamasymen, Qasym-Jomart Toqaevtyń sheshimimen 7-9 mamyr aralyǵynda Sırıa jerinen "Jýsan" operasıasymen 231 qazaqstandyq qaıtarylǵan-dy. Olardyń ishinde 16 er adam, 59 áıel jáne 156 bala bar.

Eline orala salysymen 16 er adam jáne 4 áıel Qazaqstanda tyıym salynǵan "Daısh" uıymynyń jaǵynda terrorlyq múddede qyzmet jasady degen aıyppen qamaýǵa alyndy.

Qalǵandary Aqtaý qalasyna jaqyn mańda ornalasqan beıimdelý ortalyǵyna ornalastyryldy. Olarmen psıhologtar, bilikti dárigerler jumys jasaýda. Beıimdelý úderisi bir aıǵa jýyq ýaqytqa josparlanǵan.

Balalardyń kópshiligi mektep jasyna deıingiler. Olardyń ishinde 18 jetim bala bar. Aıta ketý kerek, "Jýsanmen" jurtqa jetken qazaqstandyqtar arasyndaǵy balalardyń kópshiligi jat topyraqta dúnıege kelgen.