Búgin – Qazaqstannyń qazirgi prezıdenti Qasym-Jomart Toqaevtyń týǵan kúni. 66 jasqa tolǵan memleket basshysynyń ómiri, mansap joly, otbasy týraly túrli qyzyqty materıaldar jaryq kórýde. Qamshy.kz aqparat agenttigi de óz kezeginde prezıdenttiń otbasyna qatysty qyzyqty faktini jarıalaǵysy kelip otyr.
Qasym-Jomart Toqaevtyń ata-anasy týraly, ásirese ákesi týraly derek kóp-aq. Óıtkeni, onyń ákesi Kemel Toqaev – qazaq ádebıetine detektıv janryn alyp kelgen belgili qalamger. Ekinshi dúnıejúzilik soǵystyń birneshe maıdandaryna qatysqan ol Almatyǵa oralyp, memlekettik qyzmetten shektelgennen keıin ǵana jazýǵa birjola bas qoıǵan.
Kemel Toqaevtyń Qasym degen aǵasy bolǵan. Sol kisi maıdannyń alǵashqy jyldarynda-aq soǵysqa attanyp, artynsha qara qaǵaz keledi. Aǵasynyń atyn óshirmeýdi ómirlik múdde kórgen kóregen jazýshy balasynyń atyn da solaı ataýdy uıǵarǵan.
"Ózimniń esimim úshin taǵdyr kórýge jazbaǵan kókeme qaryzdarmyn. Al jany jomart, peıili keń azamat bolsyn dep armandaǵan anam meni Jomart atapty", – dep túsindirip beredi Toqaev "Áke týraly tolǵanys" atty kitabynda.
Al anasy Turar Shabarbaeva otbasynda jazýshynyń jaǵdaıyn jasaýǵa bar kúshin salǵan. Sonyń arqasynda Kemel Toqaev qalamynan qazaq ádebıetiniń dáýirleýine úles qosqan ondaǵan shyǵarma jaryq kórdi.
Já, taqyrypta aıtqan baǵytymyzǵa oıysalyq. Bir kúni Almaty qalasynan Qasym-Jomart Kemelulynyń anasy Brejnevtiń sherýin kórip qalady.
"Men sol kezde osyndaı baqytty ári jaýapkershiligi mol tirshilik bizdiń Jomartqa da buıyrǵaı dep tilek tiledim. Bul tilegimdi estigen Kemel "Alla qabyl etsin!" dep jaýap bergen", - deıdi prezıdenttiń anasy ótken shaqqa oralyp.
Mine, Qasym-Jomart Kemeluly búginde Qazaqstan Respýblıkasynyń prezıdenti qyzmetin atqarýda. Alda kele jatqan 9-maýsymdaǵy kezekten tys prezıdenttik saılaýyna kandıdat retinde tirkelip, qazir úgit-nasıhat jumystaryn júrgizýde.
Tekti adamnan tekti urpaq týady. Jazýshynyń ór rýhy men ult, halyq hám el úshin degen adal nıeti ulynyń boıyndaǵy qanmen qosyla júrip turǵany sózsiz.
Daıyndaǵan: Ádilet Mádenıet
