Elimizde kezekten tys prezıdent saılaýy bastalǵaly beri sózin el tyńdaıtyn azamattar boljam jasap, halyqty saılaýǵa, daýys berý úrdisine selqos qaramaýǵa shaqyrýda.. Osy rette Qamshy.kz aqparat agenttigi belgili qoǵam belsendisi, kásipker Marǵulan Seısembaıdyń áleýmettik jelidegi paraqshasyna jarıalaǵan jazbasyn oqyrmandar nazaryna usynǵandy jón kórdi.

"Dostar, kóptegen adamdardyń suraqtaryna jaýap berý úshin jáne kóptegen bos sóz ben ótirikten tazalaý úshin men myna saılaý naýqany jóninde kishigirim taldaý jasadym.

Sonymen. Bizde tórt jol bar:

1. Daýysty Toqaevqa berý.

Onda sizder barlyǵy qalyptasqan kúıde qala bergendi tańdaısyńdar. Óıtkeni Toqaev ózin Elbasynyń saıasatyn jalǵastyrýshy retinde kóredi. Toqaev pen Qosanovtan basqa úmitkerler jáı qydyryp júrgen jandar, sondyqtan olardy múldem qarastyrmaımyn.

2. Daýysty Qosanovqa berý.

Ol kisi týraly bılik pen radıkaldy opozısıa ár túrli sóz aıtýda. Bireýler ony Aqordaniki deıdi, bireýler opozısıa deıdi. Sizdiń bul jóninde bilý kerek nárseńiz, ol Qosanovtyń tulǵasy emes, ol sizderdiń qalyptasqan jaǵdaıǵa qarsy ekenińizdi bildirýdiń zańdy jáne órkenıetti joly. Sizderdiń elimizdegi ózgeriske degen talabyńyzdyń bildirý joly. Ia, bılik sizderdiń daýystaryńyzdy "urlaýy" múmkin. Biraq, eger kóp adam Qosanovqa daýys berse, exit pool arqyly qansha daýys urlanǵanyn kórýge bolady. Jáne bılik olarǵa qanshama adam qarsy ekenin kórip ózgeristerge jol ashýy múmkin. Biraq, esterińizde bolsyn, bul tek qana múmkindik! Meniń boljaýym boıynsha, bul joldyń ózgeristerge aparý múmkindigi - 33%. Bul jol meniń oıymsha, 67% eshqandaı ózgeriske ákelmeıdi.

3. Baıkottaý.

Bul – úshinshi jol. Eger siz saılaýǵa qatyspasańyz onda Toqaev 100% jeńedi. Ol basym daýyspen jeńgen soń, ol óziniń jeńisin bul xalyqtyń shyn tańdaýy dep esepteıdi de, bılikke qarsy shyǵyp júrgen adamdardy jáı kishkentaı ǵana Áblázovtyń toptary dep qýdaǵalaıdy. Qansha xalyqtyń ózgeriske degen talaptary bar ekenine kózi jetpeıdi. Baıkottaý arqyly sizder eshteńe dáleldeı almaısyz. Eýropa qansha baqyrsa da, bizdiń bılik oǵan pyshtyrmaıdy da. Barlyǵy buryńǵy qalpynda júre beredi. Baıkottaý tek qana xalyqtyń basym bóligi jasaǵanda ǵana tıimdi. Al xalyq ondaı aýyzbirshilik kórsetpese, onda onyń ózgeristerge ákelý múmkindigi 10-20% aspaıdy.

4. Alańǵa shyǵý.

Bul – eń radıkaldy jol. Árıne bul jol ózgeriske ákeledi, biraq ol ózgeristerdiń qandaı bolatynyna kim kepil? Bul aýrýdyń denesine jasalatyn kúrdeli operasıamen salystyrýǵa bolady. Arty ne bolatynyn eshkim bilmeıdi. Aýrý múldem jazylyp adam jańaryp, jasaryp ketýi de múmkin, biraq aýrýy jazylmaı ólip te ketýi múmkin. Árıne, shet elde júrgen keıbir qandastarymyzǵa bul eń qolaıly jol, óıtkeni olarǵa bul elge oralýdyń bir-aq joly. Tarıxta barlyq revolúsıalar jaqsylyqqa ákelgen joq. Kóptegen revolúsıalar ózderiniń basynda qoıǵan maqsattaryna jetken joq. Bizge bul jol qanshalyqty kerek ekenin ózderińiz oılanyńyz.

Dostar, kórip otyrsyz ǵoı, aldymyzda qıyn tańdaý tur. Múmkindigimiz kóp te emes. Biraq bári bir bizdiń tańdaýymyz bar. Esterińizde bolsyn, eger siz sanaly túrde ózińiz tańdaý jasamasańyz, onda siz úshin basqa bireý tańdaý jasaıdy. Keıin renjimeńiz.

P.S. Saılaýdan keıin bizde qansha tańdaýymyz bolatynyn siz qazirgi tańdaýyńyzben sheshesiz.

P.P.S. Men eshbir jolǵa úgittep jatqan joqpyn. Bul jáı taldaý".

Daıyndaǵan: Ádilet Mádenıet