Mereı Qarttyń sózine jazylǵan,  áni - Erlan Tóleýbaıdyń «Uly dala urany» atty Danıar Rahymbaıdyń oryndaýynda jańa án jaryq kórdi, dep habarlaıdy Qamshy.kz aqparat agenttigi.

Ol týraly Erlan Tóleýbaı Facebook áleýmettik jelisinde bólisti.

"Ánniń de týý tarıhy qyzyq. Keıde keýde túkpirińe qonaqtaǵan áýenniń ne aıtqaly turǵanyn tap basyp tanı almaı dilgiresiń. Sol yrǵaq seni tynysh jatqyzbaıdy, tún uıqyńdy tórt bóledi. Degenmen mazańdy qashyryp, janyńdy jaı taptyrmaǵan sol áýez, sol yrǵaq shyryldaǵan balapannan bir kúni qanatyn qomdaǵan qyranǵa aınalady. Mine, sol kezde sen ony ushyratyn baǵyt izdeısiń. Baǵyt - sóz. Sóz bolǵanda da, mirdiń oǵyndaı sóz, áýenniń ózegine túsip ketetin sóz! Al keıde kerisinshe, keremet óleń tyńdaısyń. Sol sátte júregińde áldene shymyr ete túsedi. Aqynnyń aýzynan tógilgen sózge kókeıińde áýen ilesedi. Tula boıyńa diril júgiredi. Boldy. Jańa án týdy degen osy! Esterińizde bolsa, jyl basynda Elbasy jastarmen kezdesken. Sol jıynda adýyndy jas aqyn Mereı Qart bir ǵajap óleń oqyǵan edi. Qulaǵyma birden attyń dúbiri keldi. Sol dúbir dombyranyń kúmbirine ulasty ma, qobyzdyń yzyńyna jalǵasty ma, áıteýir meni ózine baýrap aldy. Qulaqty aıtasyz, kózime saıyn dalany erkin jaılaǵan Saq babalar elestegendeı boldy... «Uly dala urany» ánim osylaı ómirge keldi. Mereıiń tasyp júrgir Mereı Qart baýyrym men talantty ánshi inim Danıar Raqymbaıǵa alǵysym sheksiz! Baǵasyn berý – sizderdiń sharýa. Biraq tyńdaǵanda qulaqtaryńyzǵa tulpardyń dúbiri kelerine sóz berdim!", - dedi Erlan Tóleýbaı.

♦"Uly dala urany" ánin osy jerden tyńdaı alasyz       

Usynǵan: Marjan Sábet