Kúni boıy Almatyda «qańǵyrǵan» aıaqtaryńdy áreń súırep, bálenbaı saǵat avtobýsta qos aıaqtan tik turyp, keshkurym úıge jetesiń, áıteýir. Kelgen bette kıim sheshpesten, shartty refleks sekildi birden teledıdar qosasyń. Meniń úıge keletin ýaqytym dál 31 telearnasynyń Informbúrosyna saı keledi.
Búgin de keshegi jańalyqtar sekildi. Qazaqstannyń myna qalasynda kóp balaly otbasy qýyqtaı paterde kún kórýde, myna qalada atys boldy, myna aýylda sý joq, jaryq joq, myna qalada adam óligi tabyldy, áýe mynansha adamdy ajal qushtyrdy, bálenbaı jerde bálenbaı kólik soqtyǵysty, nátıjesinde mynansha adam mert boldy.... Qudaı-aý, myna álemde, elimizde ne bolyp ketti ózi?
Osydan birneshe jyl buryn, men oqýshy bolǵanda, osyndaı oqıǵalar tek Amerıkada, Qytaıda taǵysyn basqa ózge elderde bolatyn sıaqty kórinýshi edi. Qazir dál bizdiń janymyzda bolyp jatyr. Tipti qorqasyń. Jańalyqtarda kórgende, osydan bir saǵat buryn ǵana júrip ótken jolyńda adamdy qaǵyp ketipti dep kórsetkende, deneń túrshigedi. Sol adamnyń ornynda men de bolýym múmkin edi. Keshki jańalyqtardy kóreıin dep qaı telearnany qossaq da, sol bir bitpeıtin jaǵymsyz jańalyqtar... Kórmeıin desem, kózim, estimeıin desem qulaǵym bar, átteń. İshteı duǵa tilep qana otyramyz.
Keıde avtobýsta ketip bara jatyp kóretinimiz mynaý. Úlken jolda dabylqaqqyshyn «oıbaılatyp» bara jatqan járdem kóligine jol berýdi de bilmeıdi keıbir jeke avtokólik ıeleri. Dárigerler oınap bara jatqandaı. Avtobýsta turǵan biz, beıne bir tasa jerde turǵandaımyz. Avtobýs syrtyndaǵy basqa álem sekildi. Dál sol jedel járdem bir kúni bizge de, sizge de kómektesýge osylaı asyǵatynyn bilmeımiz be álde?
Bilesiz be, «temir tulpar» ıeleri, sizdiń bir rettik jol bermeı, aınaladaǵy jaǵdaılarǵa selqos qaraǵanyńyz bir adamnyń ómirin jalmaýy múmkin. Eger... eger siz sol jedel járdemge jol berseńiz, kósheniń anaý basynda soqtyǵysqan kólikterdegi adamdy nemese órtten denesiniń jartysyn kúıip shalǵan jandy, ómirge renjip, bálenbaı qabattan ózin-ózi laqtyryp jibergen jasóspirimdi nemese qundy qaǵazdyń kesirinen «jaýlarynan» denesine aýyr jaraqat alǵan adasqan bireýdi, júrek talmasynan qulaǵan anańyzdaı, ákeńizdeı jandy aman alyp qalý múmkin bolar edi... tek eger de siz jol bergende...
Qazaǵymnyń qaı telearna bolmasyn, kúnderdiń bir kúni jańalyqtardy tek jaqsylyqtan bastap, tek jaqsylyqtan aıaqtar.. ólmeıtin úmit qana...
P.S. Adamdar, nege qatygez bolyp baramyz? Meıirimdi bolaıyqshy? Qamqor bolaıyqshy? Bir-birimizge jaqsylyq jasamaq ta jamandyq jasamaı, kún syılaı almasaq ta, kúnniń sáýlesin syılaýǵa tyrysaıyqshy?
Maqpal Sembaı
