Áleýmettik jelilerde kópqabatty úıdiń dálizinde kishkentaı balanyń sómkesin tartyp alýǵa umtylys jasaǵan áıel adamnyń baqylaý kamerasyna túsken vıdeosy keńinen taralýda dep habarlaıdy Qamshy.kz aqparat agenttigi Zakon.kz saıtyna silteme jasap.

Jeli qoldanýshylary alǵashynda bul oqıǵany Nur-Sultan nemese Almaty qalasynda boldy dep boljaǵan. Shyn mánisinde, atalmysh keleńsizdik Qyzylorda qalasynda oryn alypty.

Vıdeoda 9-10 jasar balanyń artynan dálizge kirgen áıel adamnyń onymen tildesip, artynsha sómkesin tartqylaǵany anyq kórinedi. Birshama ýaqyttan keıin joǵary qabattan balanyń anasy (boljam boıynsha) túsip, sómkeni qaıtarýǵa umtylady. Biraq álgi áıeldiń ony ońaılyqpen berer túri baıqalmady. Tek syrttan kirgen er adamnyń iske aralasýymen ǵana balanyń sómkesi ıesine qaıtarylǵan.

Jeli qoldanýshylary bul oqıǵany sátsiz shyǵyp qalǵan "bala urlaý operasıasy" dep ataýda.

"2019 jyldyń 16-juldyzynda, keshki saǵat 20:40 shamasynda oblys ortalyǵyndaǵy kópqabatty úılerdiń birinde ishimdik ishken áıel kámelet jasqa tolmaǵan balanyń sómkesin tartyp alýǵa umtyldy. Sondaı-aq, zańǵa qaıshy áreketke umtylǵan áıel turǵyndardyń kómegimen qolǵa tústi. Qazir QR QK 191 baptyń 1-tarmaǵy jáne 24-baptyń 3-tarmaǵy boıynsha sotqa deıingi tergeý-teýserý jumystary júrip jatyr", - dep málimdeme jasady Qyzylorda oblystyq polısıa departamentiniń baspasóz qyzmeti.

Usynǵan: Ádilet Mádenıet