Ótken aptanyń sońynda óz úıiniń balkonynan "saılaýǵa boıkot" dep aıqaılaǵan "Nur-Sultan" qalasynyń turǵyny Darhan Ómirbaevty polısıa ustap áketken dep jazady Qamshy.kz aqparat agenttigi. 

Bul týraly 20 mamyrda Azattyq radıosynyń " AZAT NEWS" baǵdarlamasynda aıtyldy. 

Oqıǵa 17 mamyr kúni bolǵan. Sol kúni ataýly áleýmettik kómek alý úshin tórt balasynyń qujatyn ótkize almaı ashynǵan Darhan Ómirbaev úıiniń balkonynan aldaǵy kele jatqan saılaýǵa qatysty birneshe urandy aıqaılap aıtyp, aýlaǵa kórshileri jınalǵanda saılaý týraly pikirlerin suramaq bolǵan. Kóp uzamaı, ony polısıa qyzmetkerleri "qoǵamdyq tártipti buzdy" dep ustap, ertesi kúni oǵan "bılik ókiline baǵynbady" degen aıyp taqqan.

Alaıda, Darhan Ómirbaevty ustap alyp bara jatqanyn vıdeoǵa túsirgen sol mańdaǵylar quzyrly organ ókilderi oǵan kúsh qoldanǵanyn aıtyp otyr. Darhan Ómirbaevtyń zaıyby Dınara Ómirbaeva Azattyq tilshisine polısıa ókilderi kúıeýi ekeýiniń kózine gaz balon shashyp, olarǵa (kúıeýi ekeýine) qarsy elektroshok qoldanǵanyn aıtqan. Rasynda, kýágerler túsirip alǵan vıdeoda da olarǵa qarsy polısıa kıimindegi adamdardyń elektroshok qoldanyp júrgenderi anyq baıqalady.

Al búgin osy oqıǵaǵa baılanysty Nur-Sultanda sot otyrysy bastaldy. Biraq Darhan Ómirbaev óziniń qorǵaýshysynyń bolmaýyna baılanysty sýdıadan sotty keıinge shegerýin suraǵan. Al sýdıa oǵan qorǵaýshy tabýyna tek úsh saǵat qana berip, tústen keıin sot otyrysy qaıta ótetinin aıtqan. Alaıda tústen keıin Darhan Ómirbaev sotqa kelmegen. Sot bolsa, ony kúshtep alyp kelýge buıryq bergen.