Sheshenstan Respýblıkasynyń basshysy Ramzan Qadyrov Ýkraınanyń jańa prezıdenti Vladımır Zelenskııge renishin bildirdi dep habarlaıdy Qamshy.kz aqparat agenttigi. Bul týraly Ramzan Kadyrov Telegram arnasynda jazdy.

Esterińizde bolsa, Zelenskıı ulyqtaý rásiminde sóılegen sózinde prezıdenttik qyzmetindegi basty maqsaty – Qyrym men Donbassty Ýkraına quramyna qaıtarý ekenin basa aıtqan-dy.

"Men siz týraly múlde basqa pikirde bolǵanmyn. Tájirıbeli, tanymal shoýmennen kemeńger jáne tereń oılanatyn saıasatkerge aınalady dep oıladym. Al siz múlde basqasha áreket ettińiz. Jaqsy kórshiler olaı jasamaıdy! Sizge renjýge májbúrmin. Birinshi kúnnen-aq olaı etkim kelmep edi", - dep jazdy Qadyrov óziniń jazbasynda.

Sheshenstan basshysynyń pikirinshe, Zelenskıı de jáne odan keıin keletin izbasarlary da "Qyrym san ǵasyrlardan beri Reseıdiń bir bóligi bolyp kelgenin jáne árqashan solaı bolyp qalatynyn" este saqtaǵandary durys.

Osy tusta, Qadyrov Zelenskııge oryndalmaıtyn úmitterden arylý úshin tarıhty oqýǵa keńes berdi.  

"Eger Reseıge bóten memlekettiń jeri qajet bolsa, Kıev áldeqashan Reseı Federasıasynyń batysyndaǵy oblys ortalyǵyna aınalar edi. Biraq, Reseı eshqashan bulaı jasamaıdy. Biz baýyrlas ýkraın halqynyń memlekettik aýmaqtyq tutastyǵyn qurmetteımiz. Biz bóten jerge qyzyqqan emespiz, biraq óz jerimizdi eshkimge bermeımiz!" - dedi Qadyrov óz jazbasynda.

 Daıyndaǵan: Dáýren Sybanbaı