Aqmola oblysynda sporttyq báseke barysynda Kókshetaý qalasynan kelgen 15 jasar bala qaıtys boldy. Dárigerlerdiń aıtýynsha, onyń qazasyna júrek talmasy sebep bolǵan dep habarlaıdy Qamshy.kz aqparat agenttigi oblystyq bilim basqarmasyna silteme jasap.

Qaıǵyly oqıǵa "Alaý" áskerı-sporttyq oıyndary ótkizilip jatqan "Zvezdnyı" balalardy saýyqtyrý ortalyǵynyń aýmaǵynda oryn alǵan. Estafeta kezinde №4 mekteptiń toǵyzynshy synyp oqýshysy márege jete almaı qulaǵan.

Oblystyq dene shynyqtyrý dıspanseriniń dárigeri Qanat Qusaıynov balaǵa alǵashqy medısınalyq kómek kórsetti. Bilim basqarmasynyń málimetine súıensek, bala jedel túrde Shýchınsk qalasyndaǵy aýdandyq aýrýhanaǵa jetkizilip, sol jerde esin jınaı almaǵan kúıi dúnıeden ótken.

"100 metr qashyqtyqqa júgirgen sportshylardyń biriniń qulap qalǵanyn kórgen boıda oǵan alǵashqy medısınalyq kómek kórsettim. Júrek tusyn ýqalap, jasandy dep berdim. Artynsha arnaıy kólikpen aýdandyq aýrýhanaǵa jetkizdik. Jol boıy raenımasıalyq sharalardy kórsetip bardym", - deıdi Qanat Qusaıynov.

Oblystyq densaýlyq saqtaý basqarmasy balanyń ólimine júrek talmasy sebep bolǵan dep málimdeme jasady. Al İİM qyzmetkerleri atalǵan oqıǵa boıynsha tergeý jumystaryn jáne medısınalyq saraptama júrgizip jatyr.

Bizge belgili derekterge súıensek, №4 mekteptiń jarysqa baratyn komandasynda alǵashynda basqa bala bolypty. Báseke bolatyn kúni ol belgili bir sebeptermen dodaǵa kele almaı qalady. Qaza tapqan bala sol oqýshynyń ornyna qatysqan eken. Sondaı-aq, №4 mekteptiń áskerı jetekshisi bul jarysqa kelmeı, onyń orynyna kókshetaýlyq basqa mektepten jas muǵalim oqýshylardy jarysqa alyp kelipti.

Aýdarǵan: Ádilet Mádenıet