Qashpaq bolǵan birneshe adam mına basyp mert boldy. Birazyn snaıperler atyp tastady. "Jýsan" operasıasy kezinde Sırıadan elge jetkizilgen otandastarymyz soǵys oshaǵynda júrip, kórgen qorlyqtarymen bólisti. Sodyrlar eresekterdi bylaı qoıǵanda, balalarǵa da qarý kezengen eken. Abaqtyǵa da qamaǵan dep jazady Qamshy.kz aqparat agenttigi Eýrazıa birinshi arnasynyń deregin negizge alyp.
Soǵys oshaǵynan kelgen bala túrli-tústi sýret salýǵa bolatynyn bilmeıtindeı kórinedi. Bul - "Jýsan" operasıasy sheńberinde elge oralǵan 156 balanyń barlyǵyna ortaq jaıt. Búldirshinder úıdi de, dalany da tek qara tústi qarandashpen bederlegen. Psıhologtar muny "tereń depressıanyń belgisi" deıdi.
"Alǵash kelgende balalar ushaqty kórip qashatyn. Ústeldiń, oryndyqtyń astyna tyǵylyp otyratyn. Keı balalardyń aqyl-esinde kemistigi bary anyqtaldy. Oǵan analarynyń júktiligi adam tózgisiz jaǵdaıda ótkeni sebep bolǵan. Olar dárigerdiń kómeginsiz qarańǵy jertólede bosanǵandaryn aıtqan edi", - deıdi Lola Shakımova atty psıholog.
Ońaltý ortalyǵyndaǵy psıhologtyń mundaı baılam jasaýyna ne túrtki bolǵany oralǵan áıelderdiń sózinen keıin ańǵarylady. Sham jerine aıaq basqan adam elge qaıtý týraly umytýy shart. Bolmasa oqqa ushasyń.
Oq tek áıelderge ǵana emes, balalarǵa da atylǵan sekildi. Óıtkeni elge qaıtqan kishkentaı otandastarymyz oıynnan emes, qarýdan jaralanǵany belgili boldy.
"Segiz-toǵyz jastaǵy balalardyń dıagnozy "ognestrelnoe ranenıe". Sonymen jatqan balalar bar", - deıdi Munaıly aýdandyq emhanasynyń dáriger-pedıatry Albına Aıtpaǵambetova.
Keıin qaıtqysy keletinder úshin túrme de bolǵan sıaqty. Asyr salyp oınaýdyń ornyna búldirshinder temir tordyń ar jaǵyn kórýmen júrgen eken.
"Kasra deıtin jerge apardy túrmege. Sol jaqta 12 kún otyrdyq. Sosyn bizdi Holǵa jiberdi. Sol Holda 4 aı otyrdyq. Sol jerde shamamen 5 aı boldyq", - deıdi soǵys oshaǵynda bolǵan jasóspirim.
Baǵynbaǵany abaqty, erkindiktegisi atylǵan oq pen bombany kórgen, sózderine sensek. "Tozaqtan shyǵatyn jol bolmaıdy" degenderdiń endi úmiti paıda boldy.
"Ushaqqa otyrǵan sátte jylaı bastadym. Jan-jaǵymdaǵylar "nege jylaısyń?" dep surady. "Qýanǵannyń áseri" dedim. Balalarym úshin qýandym. Endi emin-erkin oınaıdy. Uıyqtaýǵa jatqanda erteń oıanamyz ba, joq pa, bilmeıtinbiz. Ol qorqynysh endi artta qalady dep oılaımyn", -deıdi ol.
Endi qabaǵy túsken balalardyń ezýine de kúlki uıalady...
Usynǵan: Ásel Bolatqyzy
