Olımpıada chempıony jerlesi Gennadıı Golovkındi qaralaıyn degen oı bolmaǵanyn málimdedi dep jazady Qamshy.kz aqparat agenttigi  Sputnik Qazaqstanǵa silteme jasap.

Rıo Olımpıadasynyń chempıony, kásipqoı boksshy Danıar Eleýsinov suhbatynda burynǵy álem chempıony Gennadıı Golovkınge qatysty daý neden týyndaǵanyn túsindirdi.

Golovkın óziniń 8 mamyr kúni ótetin boks keshinde Danıar Eleýsinovtiń judyryqtasýyna qarsy bolǵanyn buǵan deıin jazǵan edik. Burynǵy álem chempıony bul sheshimin: «Danıar ózi aıtqandaı, «bizdiń jolymyz» bólek. Bul – onyń óz sózi» dep túsindirdi.

Buǵan qatysty Danıar Eleýsinovtiń de óz aıtary bar.

«Jerlesimniń meniń óner kórsetýime qarsy bolǵany aıdan anyq. Gennadıı Golovkın jýrnalıserge bergen suhbatynda «Danıar ekeýmizdiń jolymyz bólek» depti. Golovkınniń áreketi onyń deńgeıine sáıkes kelmeıdi dep esepteımin. Biraq bul máselede bir nárseni eskergen jón. Mende ony qaralaıyn degen oı bolǵan joq. Eger renjise, menimen betpe-bet júzdesip, ózimnen suraýǵa da bolar edi. Ashyǵyn aıtaıyn, men Gennadııge renjigen joqpyn. Oǵan tek sáttilik tileımin», – deıdi sportshy aǵynan jarylyp.

Sonymen qatar Eleýsinov Golovkınniń keshinde óziniń ornyna shyǵatyn ózbek Israıl Madrımovqa da kiná artpaıtynyn, sportta mundaı jaǵdaılar bolyp turatynyn jetkizdi. Danıar áýesqoı boksta bul sportshyny eki ret jeńgen eken.

«Onyń esh kinási joq. Ol – jaqsy boksshy», – dep qysqa qaıyrdy ol.

Aldaǵy jekpe-jekke daıyndyq qalaı?

Áńgime barysynda Danıar 25 mamyrda AQSH-ta ótetin jekpe-jegine qalaı daıyndalyp jatqanyn aıtyp berdi.

«27 jastaǵy meksıkalyq qarsylasym tájirıbeli. Jeńisimen qatar jeńilisi de bar. Namysty qoldan bermeýge tyrysamyn.

Boks – aýyr sport, neshe túrli jaǵdaı  bolýy múmkin. Osy aptada sharshy alańǵa shyǵamyn. Daıyndyǵym jaqsy. AQSH-tyń Florıda shtatynda bas bapkerim ákem men Erık Santos daıyndap jatyr», – dedi sportshy.

«Soqqysy álsiz deıtindermen kelispeımin»

Olımpıada chempıony «Danıar, pancher emes, soqqysy álsiz, kóbine texnıkaǵa súıenedi» degen synǵa da jaýap bere ketti.

«Barlyq adamnyń pikir bildirýge quqy bar. Biraq óz basym munymen kelispeımin. Árbir boksshynyń ózine tán judyryqtasý máneri bolady. Osyny esepke alǵan jón. Rıngte ýaqytty utymdy, sátti paıdalaný kerek. Sondyqtan soqqymdy álsiz dep eseptemeımin. Bokstaǵy jekpe-jektiń taǵdyryn ýaqyt sheshedi. Kásipqoı boksta urymtal sátti utymdy paıdalanyp, soqqy jasaı bilý kerek. Tek asyqpaǵan abzal», – deıdi boksshy.

Danıar óz salmaǵyndaǵy Kıt Týrman, Shon Porter, Errol Spens, Terens Kroýford syndy myqty boksshylarmen kezdesýge qatysty oıyn aıtty.

«Bolashaǵymdy aldyn ala boljaǵandy unatpaımyn. Allanyń buıyrǵany bolady. Biz tek amalyn jasaımyz. Sondyqtan jetistikke jetý úshin kóp eńbektený kerek», – deıdi Eleýsinov.

«Olımpıada chempıondaryn kinálaýǵa bolmaıdy»

Danıardan áńgime barysynda elimizde Olımpıada chempıondary nelikten kásipqoı boksqa aýysa bermeıtinin suradyq.

«Olımpıadaǵa qatysqan boksshylar kásibı boksqa aýysýdan qashqaqtaıdy dep oılamaımyn. Qazaq boksshylarynyń basty maqsaty – Olımpıadaǵa qatysý ári ony jeńý. Olardyń qatarynda men de boldym. Men de Olımpıada chempıony bolýdy armandadym. Ol basty maqsatym boldy. Buryn qazaq sportshylarynda «kásibı boksqa aýysý» degen túsinik bolǵan joq. Jigitter boksta qanshama jyl ter tógedi. Ýaqytynyń kóp bóligin oqý-jattyǵý jıynynda ótkizedi. Otbasyn da kórmeıtin ýaqyttar bolady. Birneshe Olımpıadaǵa qatysqan boksshylar bar. Keıbiriniń kásibı boksqa aýysýyna ýaqyty jetpeı jatady. Birinshi bolyp kásibı boksqa Vasılıı Jırov aýysty. Onyń jolyn Gennadıı Golovkın jalǵastyrdy. Ol kásibı boksta úlken jetistikterge jetken soń, qazaqstandyq boksshylarda qulshynys paıda boldy. Sondyqtan Olımpıada chempıondaryn «kásibı boksqa nege aýyspaıdy?» dep kinálaýǵa bolmaıdy», – dep túsindirdi ol.

Boksshy uly Danıelge ýaqyt bólip turatynyn, jekpe-jeginen tys ýaqytta Qazaqstanda bolatynyn atap ótti.  

«Danıelge men de qaraımyn. Qudaıǵa shúkir, balam ósip jatyr.

Ol Nur-Sultanda anasymen birge turady. Bıyl ulym 4 jasqa tolady. Danıel boksshy bolatyn, bolmaıtynyn ózi sheshedi. 2018 jyldyń jazynda kásibı boksta ekinshi jekpe-jegimdi ótkizgennen keıin Saıda esimdi qyzǵa úılendim. 2019 jyly 1 mamyrda ekinshi ulym dúnıege keldi. Balamnyń atyn Muhammed paıǵambardyń qurmetine Muhammed dep qoıdym», – dep túıindedi sózin boksshy.

Usynǵan: Ásel Bolatqyzy