2019 jylǵy 15 mamyrda Almaty Qylmystyq ister boıynsha mamandandyrylǵan aýdanaralyq soty «Alıev» UQT jetekshisi Qadyr Alıevke jáne qylmystyq topqa qatysýshylar Ańsar Dartaevqa, Dmıtrıı Tereshın men Ersen Jumabaevqa úkim shyǵardy dep habarlaıdy Qamshy.kz aqparat agenttigi UQK baspasóz qyzmetine silteme jasap.
Sottalǵandardyń tórteýi de QR QK 125-babynyń 2-b. 1), 8) tarmaqtarymen, 191-babynyń 4-b. 2) tarmaǵymen, 287-babynyń 3-b. jáne 390-babynyń 2-b. (adam urlaý, tonaý, qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý, bılik ókiliniń nemese jaýapty memlekettik laýazym atqaratyn laýazymdy adamnyń ataǵyn ózdiginen ıemdený) kózdelgen qylmystardy jasaǵany úshin kináli dep tanyldy.
UQT jetekshisi men oǵan qatysýshylar K. Alıev, A. Dartaev, D. Tereshın men E. Jumabaev 7 jyl jáne 1 aıǵa bas bostandyǵynan aıyrýmen qaýipsizdigi ortasha túzeý mekemesinde jazasyn óteýge sottaldy.
Buryn habarlanǵandaı, 2018 jylǵy 10 qazanda Almatyda QR Ulttyq qaýipsizdik komıteti İshki ister mınıstrligimen birlesip, Almaty oblysynyń turǵyny K. Alıevtiń jetekshiligindegi asa qaýipti qarýly uıymdasqan qylmystyq top áreketin anyqtap, jolyn kesti.
Qylmystyq toptyń negizin burynǵy quqyq qorǵaý organdarynyń qyzmetkerleri quraǵan, olar 2018 jylǵy 13 qyrkúıekte Jambyl oblysynda Otar stansıasynda kásipker R. Agalúllınge qarýly shabýyl jasap, 107 myń dollar, 4 mıllıon rúbl jáne 23 myń evro ıemdengen.
Tintý is-sharalary barysynda ustalǵandardan 8 pıstolet pen qarý, 140 birlik oq-dári, radıostansıalar, avtomobılderdiń jalǵan nomerlik tirkeý belgileri, matadan jasalǵan betperdeler, kisender men basqa da qaraqshylyq shabýyl jasaýǵa arnalǵan quraldar tabylyp, alyndy.
Júrgizilgen jedel-tergeý is-sharalarymen urlanǵan aqshalaı qarajat jábirlenýshige qaıtaryldy.
Aýdarǵan: Ildar Adılchenov
