Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń aıasynda Jambyl oblysynda baıandy bastamalar qolǵa alynyp, jarqyn jobalar júzege asýda. Ásirese, ulttyq qundylyqtardy ulyqtaýǵa, tereńnen tamyr tartatyn tektiligimizdi dáripteýge basymdyq berilýde. Sonymen qatar jaýhar jádigerlerdi nasıhattaý arqyly tól tarıhymyzdyń taǵylymyn tanytýǵa da aıryqsha kóńil bólinýde. Osy oraıda Jambyl oblysy ákimdigi týrızm basqarmasynyń uıymdastyrýymen ortaǵasyrlyq Tórtkúl saraı kesheninde «Kóne Taraz sheberleriniń» qalashyǵy ashyldy.
Aıta ketý kerek, qutty qundylyqtardyń ordasyna aınalǵan qalashyqtyń esigi alty aı aıqara ashyq bolmaq. Iaǵnı ár aptanyń demalys hám mereke kúnderi qala qonaqtary men turǵyndary emin-erkin etnoaýylǵa bas suǵyp, ómirsheń óner týyndylaryn tamashalaı alady.
Ulttyq naqyshta kıinip, qazdaı tizilgen analar, altybaqannyń sánin kirgizgen jastar, adyrna tartyp, nysanaǵa jebe siltegen jumyr jigitter, án men jyrdan shashý shashqan ónerpazdar, osynyń barlyǵy ortaǵasyrlyq tarıhtyń kýási bolǵan Tórtkúl saraı keshenin saltanatqa bóledi. Shet elden kelgen qonaqtarǵa da, shahardyń jergilikti halqyna da sharapatty shattyq syılady.
–«Rýhanı jańǵyrý» baǵdarlamasy aıasynda «Qazaq aýyly» etno-jobasyn qurýdyń basty maqsaty - kóne Taraz dástúrin, kóshpendilerdiń biregeı, jarqyn jáne aıqyn mádenıetin, ótken tarıhyn jańǵyrtý. Ulttyq-mádenı keshen qonaqtardy qazaq halqynyń baı tarıhymen, mádenıetimen, ónerimen jáne salt-dástúrimen tanystyrady. Keshende kez kelgen adam kóshpendiler órkenıetiniń etno mádenı ortasyn sezine alady jáne aýyldyń kúndelikti, merekelik ómirine kóz júgirtýge tolyǵymen ıe bolady. Etnoaýylda qazaq mýzykalyq jáne teatr óneriniń festıválderi, qolóner sheberleriniń master-klasstary, ulttyq taǵamdar, qolóner jáne kórkem óner kórmeleri, etnıkalyq mýzykalyq festıváldar, ulttyq sport túrlerinen jarystar jáne basqa da is-sharalar ótedi. Atap aıtqanda «Dástúrli ań aýlaý túrleri», «Ulttyq oıyndar men oıyn-saýyq», «Ulttyq taǵam», «Qazaq mýzykalyq-teatr óneri», «Qolónershiler» sektorlaryn tamashalaǵan adam qazaq halqynyń ádet-ǵurypy, salt-sanasy jaıly mol aqparat alatyny sózsiz,-deıdi oblys ákimdigi týrızm basqarmasynyń basshysy Qarlyǵash Aralbekova.
Shara barysynda Qazaqstan qolónershiler odaǵynyń tóraıymy Aıjan Bekkýlova sóz tizgindep, san ǵasyrlar boıy talaıdy tánti etip, urpaqtan urpaqqa mıras bolyp jetken qolónerdiń qyr-syryn, úlgi-ónegesin keńinen áńgimelep, tarazdyq sheberlerdiń shedevrlerine qoldaý bildirip, shabyt syılaǵan hám osy sharany uıymdastyrýshylarǵa alǵys bildirdi. Sahnada án men jyr tógilse, etnoaýyl mańynda zergerler ózderiniń áshekeı buıymdaryn, toqylǵan, órilgen óner týyndylaryn halyqqa tanystyrdy.
Onyń ishinde dombyranyń qalaı jasalatynyna deıin kórsetildi. Qazaq-Oner qolónershiler ortalyǵynyń basshysy Aıgúl Janserikova men Ortalyq Azıa qolónershilerdi qoldaý qaýymdastyǵynyń (CACSA) prezıdenti Mýkarrama Kaıýmova kópshilikke qolóner taqyrybyndy sheberlik saǵattaryn ótkizdi. Jalpy ótken jyly óńirge 400 myńnan astam týrıs kelipti. Olarmen júrgizilgen saýalnama qorytyndysy osyndaı sheberler qalashyǵyn ashýǵa sep bolǵan kórinedi.
Mańyzdy sharaǵa arnaıy alystan at terletip jetken óner mamandary men sarapshylar az bolǵan joq. Germanıa, Bolgarıa, Tájikstan, Ózbekstan, Qyrǵyzstan elderinen kelgen maıtalmandar da qazaqtyń qyrany qalyqtap, tazy oınaǵan, qymyz sapyrylyp, tarıhpen syrlasqan etnoaýyldan tabyldy. Ózderiniń mol tájirıbesimen bólisti. Tań sáriden keshke deıin jalǵasqan sharanyń sońynda sala maıtalmandary, qala meımandarymen áriptestik baılanys nyǵaıyp, óńidegi týrızm men ónerdi damytý maqsatynda birqatar memorandýmǵa qol qoıyldy.
Joıqyn Jiger
