Reseı qorǵanys kúshteri bas shirkeýiniń qurylysyna Nur-Sultan bergen 1 mıllıon rúbl (5,9 mln teńge nemese 15 504 dollar) Qazaqstan búdjetinen alynbaǵan. Bul týraly Qazaqstan qorǵanys mınıstriniń orynbasary general-maıor Tımýr Dándibaev Azattyq Radıosyna bergen resmı jaýabynda habarlady, dep jazady Qamshy.kz aqparat agenttigi. 

Esterińizde bolsa,14 mamyrda Qazaqstan Qorǵanys mınıstriniń orynbasary general-leıtenant Múslim Altynbaev "Qazaqstannyń qorǵanys vedomstvosy Reseıdegi bas áskerı shirkeý qurylysyna belgili bir somada qarjy aýdardy" degen. Ol "Qazaqstan atynan Ekinshi dúnıejúzilik soǵysqa qatysqandardyń esimderi Reseıdegi bas áskerı shirkeýde saqtalatynyn" aıtqan. Altynbaev shirkeý qurylysyna Nur-Sultannyń qansha qarjy aýdarǵanyn aıtpaǵan.

Qorǵanys mınıstrliginiń Azattyq radıosyna aıtýynsha, Reseıdegi shirkeý qurylysyna jiberilgen 1 mıllıon rúbl demeýshilerden alynǵan. "Demeýshiler attaryn atamaýdy ótindi. Sebebi bul kómek jarnama jasaý úshin emes, batyrlarǵa máńgi eskertkish ornatý úshin kórsetilgen" dep jazady vedomstvo ókili.

Mınıstrlik jaýabynda Qazaqstannyń Qorǵanys mınıstrligi Ekinshi dúnıejúzilik soǵysqa qatysqan qazaqstandyq ardagerlerge "taǵzym etý maqsatynda arhıv materıaldaryn jınap jatqanyn" aıtqan.

"Osyǵan baılanysty Qazaqstan Reseı Qorǵanys mınıstrligine ardagerlerdiń sýretterin, qysqasha bıografıalyq málimetterin, soǵysta qaza tapqan ardagerlerdiń erlikteri týraly derekterdi joldady. Bul materıaldar "Eske alý joly" galereıasyn qurý kezinde paıdalanylady", - deıdi vedomstvo.

Usynǵan: Mıat Káshibaı