Qazaqstan prezıdentine úmitkerlerdiń pikirtalasy 29 mamyr kúni saǵat 18.00-de "Habar" telearnasynyń tikeleı efırinde ótedi dep habarlaıdy Qamshy.kz aqparat agenttigi.
2019 jyldyń 9 maýsymynda ótetin Qazaqstan prezıdentiniń kezekten tys saılaýyna jeti úmitker ózderin usynǵan bolatyn:
- Qazaqstannyń komýnıstik halyqtyq partıasynan Jambyl Ahmetbekov;
- "Aq jol" demokratıalyq partıasynan Danıa Espaeva;
- "Ult taǵdyry" qozǵalysynyń úmitkeri Ámirjan Qosanov;
- "Aýyl" partıasynyń ókili Tóleýtaı Rahymbekov;
- Kásipodaqtar federasıasynyń ókili Amangeldi Taspıhov;
- Nur Otan partıasynan Qasym-Jomart Toqaev;
- "Uly dala qyrandary" qoǵamdyq birlestiginen Sádibek Túgel.
"Habar" telearnasynyń tikeleı efırde kórsetetin pikirtalas "Qazmedıa ortalyǵy" medıakesheninde ótedi. Telejúrgizýshiler Erlan Igisinov pen Qymbat Dosjan júrgizetin teledebat úsh kezeńge bólinedi:
Birinshi kezeńniń taqyryby – "Qazaqstannyń ekonomıkalyq damýynyń basymdyqtary". Ol eki aınalymdy qamtıdy, dep jazylǵan telearnanyń habarlamasynda.
Birinshi aınalymda árbir kandıdat óziniń saılaýaldy baǵdarlamasyn tanystyrýy kerek. Ekinshi aınalymda qatysýshylar qarsylastaryna eki suraqtan qoıa alady, sondaı-aq eki suraqqa jaýap beredi.
Ekinshi kezeńniń taqyryby – "Qazaqstannyń áleýmettik jańǵyrtylýy". Birinshi aınalymda prezıdenttikke kandıdattar taqyryp boıynsha sóz sóıleıdi, al ekinshi aınalymda júrgizýshiniń bir suraǵyna jaýap beredi.
Úshinshi kezeńniń taqyryby – "Saılaýshylarǵa sóz". Prezıdenttikke úmitkerler Qazaqstan halqyna úndeý jasaıdy.
Usynǵan: Maqpal Sembaı
