Jambyl oblysynda Jastar jylyna oraı kóptegen sharalar qolǵa alynyp, jastardy qoldaý jumystary júıeli túrde júzege asyp keledi. Máselen, «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy aıasynda jańa bıznes-ıdeıalardy damytýǵa respýblıkalyq búdjetten 200 aılyq eseptik kórsetkish mólsherinde 329 jasqa qaıtarymsyz grant retinde 166,1 mıllıon teńge qarjy bólindi. Árqaısysyna 505 myń teńgeden keledi.
Odan bólek, «Bıznestiń jol kartasy-2020» memlekettik baǵdarlamasy sheńberinde jańa bıznes-ıdeıalardy iske asyrý úshin 3 mıllıon teńgege deıingi memlekettik grant berýge oblystyq búdjetten 303 mıllıon teńge, respýblıkalyq búdjetten 21 mıllıon teńge, jalpy 324 mıllıon teńge qarjy bólindi.
Jambyl oblysy ákimdiginiń jastar saıasaty máseleleri basqarmasynyń bastamasymen Taraz qalasy men aýdandarda arnaıy komısıalar qurylyp, kásipkerlikpen aınalysýǵa nıet bildirgen jastardyń bazasy jasaqtalyp, ol jerge 300-ge jýyq jas engen.
Jastardyń kásipkerlikpen aınalysýyna qoldaý bildirip, kómektesý sharalary munymen shektelgen joq. Máselen, bıylǵy jyly jastardy kásipkerlikke oqytý baǵytynda da birshama jumystar qolǵa alynýda. Atap aıtsaq, 600-den astam jasty kásipkerlik negizderine oqytý josparlanyp otyr. Sondaı-aq, 200-ge jýyq jasty shaǵyn nesıemen qamtý máselesi de nazarda tur. Osylaısha, jastardyń boıyndaǵy kásipkerlikpen aınalysýǵa degen ynta men osy sala boıynsha bilimin shyńdaýǵa jiti mán berilýde. Bul baǵyttaǵy jumystar aldaǵy ýaqytta júıeli túrde júrgiziletin bolady.
Jambyl oblysynda kásipkerlikke beıimi bar osal toptaǵy jastarǵa baǵyttalǵan «Zhas Projest» jobasy aıasynda jalpy 206 joba iske asyrylǵanyn erekshe atap ótken jón. Sonyń nátıjesinde oblysqa 400 mıllıon teńge kóleminde ınvestısıa tartyldy. Al jeńimpaz atanǵan jobalardyń 77-si oblys ortalyǵynan bolsa, 129-y aýdandar men aýyldyq eldi mekenderden shyqty.
Jastarǵa ártúrli sala boıynsha aqparattyq kómek kórsetýdiń de mańyzdylyǵy zor. Osy maqsatta ótken jyly Basqarma tarapynan aqparattyq avtokerýen uıymdastyrylyp, barlyq aýdan ortalyqtary men eldi-mekenderinde bolǵan kerýen 7 myńǵa jýyq jasty qamtyǵan.
Dýlat Aıtbaı
