Bul týraly búgin óńirlik komýnıkasıalar qyzmetiniń alańynda ótken brıfıńte «Amanat» azamattyq platformasynyń Mańǵystaý oblystyq shtabynyń músheleri málimdedi.

«Amanat» azamattyq platformasynyń respýblıkalyq keńsesi 30 sáýirde óz jumysyn bastaǵan. Uıym quramynda jýrnalıser, qoǵam belsendileri men jastar qaýymy bar jobalyq keńse saılaý aıaqtalǵanǵa deıin jumys jasaıdy. Respýblıkanyń ár aımaǵynan qurylǵan keńse kezekten tys  Prezıdent saılaýyna óz qatarlarynan on myńǵa jýyq baqylaýshy shyǵarady. Osylaısha, elimizdegi ár saılaý ýchaskesine «Amanattyń» atynan bir adamnan bekitiledi. Bul belsendi erikti túrde isteıtin jumystyń bir ǵana baǵyty. Olar sondaı-aq Prezıdent saılaýynyń ádil ótýin baqylap, saılaýaldy daıyndyq, áleýmettik jelilerde daýys berýshilerdi aqparattandyrý jumysymen de aınalysady.

Mańǵystaý oblysynda saılaýdyń zań aıasynda ótýin qadaǵalaıtyn 223 táýelsiz baqylaýshy da «Amanat» azamattyq platformasynyń óńirlik shtabynda dáris alýda. Olardy  saılaý barysyn baqylaý jumystaryna baýlý úshin shtabtan 10 mobıldi kapıtan bólingen. Prezıdentikke úmitker «Nur Otan» partıasy jáne «Qazaqstan halyqtyq komýnıstik» partıasynyń shtab ókilderimen kezdesý uıymdastyrǵan «Amanattyqtar» Qaraqıa aýdanynda bolǵan saparynda baqylaýshylarmen kezdesti. Baqylaýshynyń qandaı qyzmetter atqaratyny jazylǵan metodıkalyq nusqaýlyq blaknoty ázirlenip, sarapshylyq baǵytta daıyndaý jumystary jalǵasyn tabýda. Aıta keteıik, azamattyq platforma jumysyna  tartylǵan azamattardyń eshqaısysy saıası partıalarǵa jaqtas bola almaıdy.

«Kezeń aralyq qyzmet bolǵandyqtan, az ýaqyt ishinde oblys boıynsha júrgizilgen jumystyń alýan baǵyttaryna qaramastan bizdiń komanda óziniń alǵashqy nátıjelerine qol jetkizdi dep esepteımin. Árbir azamat saılaýda óz tańdaýyn jasaýy kerek», - dedi «Amanat» azamattyq platformasynyń oblystyq shtab jetekshisi Ǵalıa Jalǵasbaı.

Sondaı – aq, brıfıńte bul salanyń negizgi 5 baǵyty týraly túsinik berildi. Alǵashqysy, saılaýǵa deıingi jáne keıingi qoǵamdaǵy ahýalǵa táýelsiz monıtorıń júrgizetin «Teńdik» baǵyty. Ekinshi, saılaýshylardyń óz quqyǵynan aqparattandyrylýy. Úshinshi, mańyzy erekshe «ádildik» baǵyty saılaýdyń ashyq ári ádil ótýi tıis degen ustanym aıasynda baqylaýshy qyzmetin atqarady. Tórtinshisi, «Kelisim» baǵyty qoǵamdaǵy pikirlerdiń ártúrli bolǵanmen, ortaq kelisimge kelip, halyq úshin qyzmet etetin prezıdentti tańdaýdy kózdeıdi. Besinshi, «Amanat» baǵyty boıynsha kez-kelgen tulǵa bolashaq prezıdentke óziniń amanatyn, ıaǵnı arman-tilegin beıne jazba arqyly joldaı alady.