Mańǵystaý oblysynda órt oqıǵasy 12 paıyzǵa azaıǵan. Muny óńirlik komýnıkasıalar alańynda ótken brıfıńte oblystyq tótenshe jaǵdaılar departamentiniń basshysy Bazarbaev Kýanar Bekenuly málimdedi.

Aldyn-alý sharalaryna sáıkes, ótkizilgen úgitteý-profılaktıkalyq jumystary búgingi tańda óz nátıjesin berýde, deıdi mamandar. Máselen, 2018 jyldyń  sońǵy bes aıynda 107 órt oqıǵasy tirkelse,  jyl basynan beri oblys aýmaǵy boıynsha 94 órt oqıǵasy bolǵan. Derekkózderge súıensek, kóbine turǵyn úıler órtengen. Otty abaısyz qoldaný, peshtiń aqaýlyǵynan, elektr jelileri men quraldaryn paıdalanýda órt qaýipsizdik erejelerin saqtamaýdan jáne balalardy qaraýsyz qaldyrý saldarynan 39 oqıǵa oryn aldy.  Al, osy ispetti  jaǵdaıǵa tap bolǵan 28 avtokólik tirkeýde tur. Bul ótken jylmen salystyrǵanda 24 paıyzǵa azaıǵan. Bıylǵy jyldyń  5 aıynda  mamandar461 ret órt sóndirýge barǵan. Bul kórsetkish aldyńǵy jylmen salystyrǵanda 11 paıyzǵa kóp.  2018 jyly 3 adam qutqarylyp, 99 adam kóshirilse, bıyl 15adam qutqarylyp, 189 adam qaýipsiz jerge kóshirilgen.

«Órt – tilsiz jaý. Ony aldyn-ala boljap bilý múmkin emes. Jyl saıyn óńirde  qala jáne aýdan ákimdikterimen birigip oblys aýmaǵynda órt oqıǵasyn boldyrmaý jáne  ormandy-dalada órt qaýipsizdigin qamtamasyz etý boıynsha is-sharalar jospary  bekitiledi. Osy oraıda, Munaıly aýdanynda «Órt sóndirý» bóliminiń qurylysy bastalmaq. 60 adamdy jumyspen qamtıtyn jobaǵa respýblıkalyq búdjetten 530 mln teńge bólingen » ,- dedi Mańǵystaý oblystyq tótenshe jaǵdaılar departamentiniń basshysy Qýanar Bekenuly.

Órt oqıǵalaryn aldyn-alý maqsatynda kóptegen sharalar qolǵa alynǵan. Buqaralyq aqparat quraldarynda, telearnalar men  radıolarda habarlamalar berilse, qosymsha órt qaýipsizdik senbilikteri uıymdastyrylyp, turǵyn úı ıelerine jadnama, býkletter jáne nusqaýlyqtar taratylǵan.  Oblys kóleminde, aýdandardyń qoǵamdyq oryndarynda jáne adamdar kóp shoǵyrlanatyn oryndarda órt qaýipsizdik talaptaryn túsindiretin 22 bılbord ornatylyp, bilim berý oshaqtarynda da atalǵan taqyryp aıasynda sabaqtar ótkizilgen.