AQSH Reseıdiń Ýkraınadaǵy áreketine baılanysty odaqtastarynyń qaýipsizdigin bekemdeý úshin Shyǵys Eýropaǵa aýyr qarýlaryn ornalastyrmaq dep habarlady New York Times. Gazettiń dereginshe, Baltyq elderi men Shyǵys Eýropada 5 myń ásker turady. "Bul jospar maquldansa, aýyr qarýlar qyrǵıqabaq soǵystan keıingi kezeńde alǵash ret AQSH-tyń Shyǵys Eýropadaǵy, buryn sovet yqpalynda bolǵan, qazir NATO-daǵy odaqtastary aýmaǵynda turmaq" dep jazady gazet. New York Times muny AQSH pen NATO-nyń Reseı agresıasyn tyıýǵa baǵyttalǵan mańyzdy isi dep baǵalaıdy. Sońǵy jyldary Reseıdiń Qyrymdy aneksıalap, Ýkraınanyń shyǵysyndaǵy qaqtyǵysqa kirisken áreketinen keıin Máskeý men Batystyń arasy ýshyǵyp ketken. Reseı Ýkraınadaǵy oqıǵaǵa qatysy joq ekenin aıtyp keledi. azattyq.org