«Bostondaǵy lańkestik aktini uıymdastyrǵan basty kúdiktiler anyqtalǵannan keıin AQSH quqyq qorǵaý organdary olarǵa jaqyn jáne tanys bolýy múmkin adamdardy tekserýge kiristi. Ásirese, quqyq qorǵaý organdary kúdiktilermen birge oqyǵan jáne qandaı da bir jaǵdaımen olarmen qatynasta bolýy múmkin stýdentterden jaýap aldy. Júrgizilip otyrǵan tekseris aıasynda eki qazaqstandyq stýdenttiń oqý barysynda AQSH vızalyq rejımin buzǵandyǵy anyqtalyp, osyǵan oraı mán-jaı tolyq anyqtalǵansha olar ustalyp otyr», dep habarlaıdy SİM. «Qazirgi ýaqytta bizdiń konsýlymyz Boston qalasyna jetip, AQSH bılik organdarymen yntymaqtasýda jáne ustalǵan stýdentter jáne olardyń otbastarymen baılanysta. Qazaqstandyq dıplomattar olarǵa advokat taýyp berý máselesinde qolǵabys kórsetýde», - deıdi budan ári. «QR Syrtqy ister mınıstrligi AQSH Memlekettik departamenti jáne Astanadaǵy Elshiligimen osy másele boıynsha baılanysta. Bul másele boıynsha AQSH memlekettik organdarymen yntymaqtastyqqa ashyq ekenimizdi qaıta rastap, Qazaqstan lańkestikti jáne onyń kez kelgen túrlerin qatań túrde kinárattaıtynyn basa aıtamyz» , deıdi Syrtqy ister mınıstrligi. Budan buryn
habarlaǵanymyzdaı, AQSH-tyń quqyq qorǵaý organdary Bostondaǵy jarylysty uıymdastyrýy múmkin degen eki adamnyń birin óltirip, ekinshisin jaraly kúıinde qolǵa túsirdi. Aǵaıyndy Tamerlan men Djohar Sarnaevtar Bostonda 15 sáýir kúngi marafon kezindegi jarylysty uıymdastyrdy degen kúdikpen izdestirilgen edi. Bostondaǵy jarylysta 3 adam qaza taýyp, 180 adam jaralanǵan.
Pikir qaldyrý