Polıseı sózi grek tilinen aýdarǵanda memleket, qala degen maǵynany bildiredi. Kórshi Reseı patshalyǵynda polısıa sonaý 1719 jyly paıda bolǵan deıdi qazaqsha ýıkıpedıa. Al 1917 jyly Orynborda 2-jalpyhalyqtyń seziniń sheshimine sáıkes Alash mılısııasy quryldy. Qatarǵa 20-35 jas aralyǵynda qazaq jigitteri alynyp, olar el erteńi úshin úlken urystarǵa qatysty. Al odan árige ketsek, keshegi Bógenbaı, Qabanbaı, Er Qosaı sekildi batyrlar eski zamannyń saqshylarynyń qyzmetin atqarǵanyn bilesiz...
Polıseı – ótkende Ekibastuzda oınap júrip qum astynda qalǵan balany qutqaryp qalǵan Tahır Qasýmov. Polıseı – ótkende Kerekýde úsh balasy bar sýısıd jasamaq bolǵan áıeldi qutqaryp qalǵan Aıǵojın Erbol. Polıseı – Qaraǵandy óńirinde sýǵa batyp bara jatqan turǵyndy qutqaryp qalǵan Dastan Azanbaev. Polıseı – ol ótkende ǵana Atyraýda kópirden sekirgen qyzdy qutqaramyn dep qaza tapqan Shalqar Aqymǵalıev. Polıseı – ol jyldyń basynda Almatyda bolǵan órtte 6 adamnyń ómirin saqtap qalǵan Álimqydyr Ádilet. Polıseı – ol Petropavlda ózin ózi óltirmek bolǵan 22 jasar qyzdyń ómirin arashalap qalǵan Denıs Komorov. Polıseı – ol Tarazda bolǵan jantúrshigerlik oqıǵada qoǵam úshin janyn qıǵan Ǵazız Baıtasov emes pe?!
Bul degenińiz qoǵam - polıseı, polıseı degenimiz qoǵam ǵoı. Eki tarap ta bıliktiń ajyramas bólshegindeı. Bógenbaıǵa «Handy qoıa ber, bizdiń qatarǵa qosyl» dep aıtý aqylǵa syıar ma edi? Syımaıdy. Naýryzbaıdyń arqasynan júgirip baryp teber me edińiz? Múldem qısynsyz. Osy eki tarapty ajyratyp kórsetip, búlikke bastap, syrtymyzdan kúlip otyrǵandar jaýyz emeı kim?! Dúkenińizdiń, altyn saraıyńyzdyń tonalmaýy, balalaryńyzdyń mektepke, balabaqshaǵa esen-saý baryp kelýi, alańsyz uıqy, tipti anaý jedel-járdemniń de ýaqytyly úıińizge jetýi osy polıseılerdiń eńbegi emes pe?!
Óz basym Qazaqstan polıseıin Táýelsizdiktiń aıqyn nyshany, ajyramas bir bóligi dep bilemin. Bárimiz de «Polıseı bolamyn» dep qıaldap, armandap óstik. Búgin balalarymyz, nemerelerimiz solaı dep júr. Endeshe biz nege arandaımyz?
Forma kıip, zańǵa sáıkes mindetin atqarǵany úshin bireýdiń qamqor ákesin, bireýdiń jalǵyz ini-baýyryn, bireýdiń jap-jas balasyn jaǵadan alyp, basyna sekirgenimiz durys pa? Aqsaqaldy kóterip bara jatsa, arandap qalmasyn degeni. Áıtpese alaqan jaıyp Allasyna jalbarynyp otyrǵan jerinen kóterip ketken joq qoı. Úıde "Balapan" kórip jatatyn balańdy julqylap alyp kepsiń. Basyna býtylka tıse bolashaǵy neshik? Shyqpa dedi me, shyqpa. Shyqtyń eken, shyryldama. Jeka sekildi Seka da úıine qaıtqysy kelmeıdi deısiz be?
Pikir qaldyrý