Qazaq Ulttyq ýnıversıtetiniń fılologıa, ádebıettaný jáne álem tilderi fakúltetiniń 4-kýrs stýdenti óz dıplom jumysyn belgili ánshi Qaırat Nurtas pen ózge de qazaq estrada juldyzdarynyń shyǵarmashylyǵyna arnady.
Qaırat Nurtastyń, sondaı-aq, birtalaı jas oryndaýshylardyń ánderiniń sózin dıplom jumysyna arqaý qylyp alǵan JOO bitirýshi, sol án sózderindegi stılısıkalyq qatelikterdi tabýdy dıplom jumysynyń maqsaty retinde alǵan.
Qazirgi jastar súıip tyńdaıtyn Qaırat Nurtas jáne taǵy da basqa ánshiler qaýymy shyǵarmashylyq izdený barysynda, án sózine at ústi qarap, tek ǵana ánniń áýenine nazar aýdaryp ketedi eken. Sol sebepti de án sózderinde stılısıkalyq qatelikterdi kóptep jiberetin kórinedi.
«Qazirgi ánshiler óz ánderiniń sózine esh mán bermeıdi. Áýeni tyńdar qulaqqa jaǵymdy bolsa bolǵany, sózin sol áýenine saı qalaı bolsa solaı qurastyra beredi. Ony tyńdaıtyn jastar tek áýeniniń ásemdigi úshin sózine pysqyryp ta qaramaıdy. Mysaly: Qaırat Nurtastyń «Arman» ániniń keı sózi tek uıqas úshin ǵana qurylǵandyǵy nazar salyp oqyǵan adamǵa birden túsinikti.
Qalaı súıdim seni,
Qulaı súıdim seni.
Júregimdi ustap,
Jylaı súıdim seni; — óleń joldaryndaǵy «júregimdi ustap» tirkesiniń tym usqynsyz ári logıkasyz tirkes ekendigi ras. Mundaı stılısıkalyq qateler tek ǵana Qaırat Nurtastyń shyǵarmashylyǵynda ǵana kezdespeıdi. Sondaı-aq basqa da estrada juldyzdarynyń án sózine kelgende nemquraılylyq tanytatynyn baıqap jatamyz», — deıdi dıplomdyq jumys avtory.
Eske sala keteıik, jaqynda Qaırat Nurtas reseılik «Mýz TV» arnasynyń júldesin jeńip alǵan bolatyn.
