Qaraǵandy oblysynyń Ulytaý aýdanynda mal jappaı qyrylyp jatyr. Bul jaıynda turǵyndar telefon arqyly Astana arnasyna habarlady.

Ásirese, Qarakeńgir aýylynda jaǵdaı ýshyqqan. Munda bir aptanyń ishinde 100 bastaı mal basy aram ólgen.

«Ol aýrýdyń qaıdan kelgenin bilmeımiz. Aýyzdary ýylyp, sý aǵyp, sút irip jatyr. Qyrylǵan mal kóp. Qoı, sıyr, ásirese, buzaýlar qyrylyp jatyr. Aýyldaǵylar, dárigerler kórgenmen, qandaı dıagnoz ekenin aıtqan joq», — deıdi Ulytaý aýdany, Qarakeńgir aýylynyń turǵyny Zına Aıtbaeva.

Turǵyndar bul jaǵdaıdyń aı basynda bastalǵanyn aıtady. Dert maldardyń birinen-birine juǵyp, qyrylýy jıilep ketken. Oǵan qosa, aıaqtary isip júre almaı qalǵan tórt túlikti, aýyl halqy qazir qorada, úı mańynda ustap otyrýǵa májbúr.

Al, olardan alynǵan qan saraptamasy Astanadaǵy Veterınarıa jónindegi ulttyq zertteý ortalyǵyna jiberilgen. Degenmen, qaraǵandylyq mamandar jýyqta kıikterdiń jappaı qyrylýyna sebep bolǵan pasterellez aýrýynan da kúdiktenedi. Ázirge, Qarakeńgir aýyly men osy mańdaǵy eki qystaq maldaryn ózge aýyldan oqshaýlaý sharasy jarıalandy.

«Qazir pasterellez, mıkrobakterıaz, lısterıoz, osy úsh aýrýǵa kúdik týyp tur. Alynǵan materıaldar bári Astanaǵa Veterınarıalyq ulttyq referenttik ortalyqqa zertteýge jiberildi. Zertteý nátıjesi boıynsha anyqtalady. Qazir aýrýdy taratpaý úshin jańaǵy Qarakeńgir aýylynda maldardy ýaqytsha shekteý jarıalandy», — deıdi Qaraǵandy oblysy Veterınarıa basqarmasynyń bastyǵy Qaıyrbek Tursynbekov.