Almaty qalalyq máslıhatynyń depýtaty, ǵalym-professor, «Turan» ýnıversıtetiniń rektory Rahman Alshanov mıtıń týraly pikir bildirdi. 

Jer betinde minsiz memleket joq. Iá, ras, qoǵam bolǵan soń, bizde de problema bar. Biraq ony mıtıńpen sheshemiz deý durys emes.

Álemde soǵystan kóz ashpaı otyrǵan, balalary árip te tanymaıtyn elder bar. Al bizdiń táýelsiz Qazaqstanda halyqtyń áleýmettik jaǵdaıy árqashan birinshi kezekte turady. Almatynyń kópbalaly analaryna páter berilip jatyr. Muǵalimder men dárigerlerdiń jalaqysy kóterildi. Kásip ashqysy keletin jastar da túrli grantqa qol jetkizýde. Dıplomym joq degen qyz-jigitterdiń ózi túrli kásibı, jumysshy  mamandyqtaryna tegin oqytylýda. Máselen, bizdiń ýnıversıtette oqýyn da oqyp, qosymsha jumys kózin de taýyp, óz-ózin asyrap júrgen jastar kóp. Baıaǵyda biz de aýyldan kelgen, eshteńemiz joq stýdent bolǵanbyz. Ata-anamyzdan da aqsha suramaı, salmaq salǵymyz kelmeı, áıteýir tirshilik ettik, qazir tańqalamyn, sol kezdegi qıyndyqtardy qalaı eńsergenbiz dep.

Bul mıtıńke kópshilikti, bálkim, áldekimder aqsha beremiz dep úgittep, bizdiń berkke-birligimizdi ydyratqysy kelip ádeıi shyǵaryp otyrǵan bolar. Bizdiń memlekettiń ishki turaqtylyǵyn buzýǵa eshkimniń quqy joq. Bul keleńsiz jaǵdaıdy keshe Nur-Sultan qalasynda Prezıdentti ulyqtaý rásiminde bolǵanda estidim. Estýimshe, kóshege shyqqandardyń keıbiri qyzý sıaqty, qoldaryna ustaǵan áldebir zattary bar kórinedi. Sol zatpen abaısyzda bireýdi jazym etip alsań, ómiriń ne bolady, sony oılaý kerek. Bireýlerdiń aıtaǵyna eremin dep júrgende, erteńgi kúni «aıran ishken qutylyp, shelek jalaǵan tutylyptynyń» keri bolmasyna kim kepil. Keshe Prezıdent Qasym-Jomart Toqaev alańǵa bilmestikpen shyqqan adamdar bolsa, ustamańdar, bosatyńdar degen tapsyrma berdi. Shynymen de, kóbisi máseleniń baıybyna da barmaı, kóshege nege shyqqanyn da túsinbegen bolyp shyqty.

Biz jańa ózgeristerge kele jatyrmyz. Sony kóre bileıik. Úkimet qoǵamdaǵy áleýmettik máselelerdi kezeń-kezeńimen sheshýde. Bizge ne nársege de sabyr, talǵam degen tarazy jáne jaqsy kúnderge degen senim kerek.