Elimizde saılaý naýqany ótti. Oǵan qatysqan halyqaralyq sarapshylar ózderiniń oń baǵasyn berdi. Alaıda, araǵa bip aptadaı ýaqyt salyp, saılaý naýqanynyń ádil ótpeýin aıtyp, saılaýdy qaralaǵysy kelgen baqylaýshylar paıda boldy.

Bir top azamat adam quqyqtary jónindegi Qazaqstandyq Halyqaralyq búronyń baspasóz ortalyǵynda ótken jıynda ózderin «táýelsiz baqylaýshy» retinde tanystyrdy. Aıta ketý kerek, saılaý naýqany kezinde  biraz azamattar  resmı baqylaýshy mártebesin rastaı almaǵan edi.

«Táýelsiz baqylaýshylardyń» aıtýynsha, saılaý naýqany ádiletsiz ótken-mys. Sóıte tura jınalǵan qaýymǵa bergen málimetterinde burmalaýshylyq, bir-birine sáıkes kelmeıtin sandar, jańsaq aqparat taratyldy.

Máselen, «baqylaýshy» Serik Ábishev Almatyda 444 saılaý ýchaskesi bar jáne sol ýchaskelerde kandıdat Qosanovqa 48 paıyz saılaýshylar daýys bergen dep sendirdi.

Alaıda «Amanat» azamattyq platformasy shtabynyń jetekshisi Qazbek Shaıh spıkerdi birneshe ret túzetip, Almatyda resmı túrde 554 ýchaskeniń bolǵanyn jáne buǵan deıin jarıalanǵan Serik Ábishevtiń málimetteri boıynsha kandıdat Ámirjan Qosanovqa saılaýshylardyń 38 paıyzy daýys bergenin málimdedi.

Qazbek Shaıhtyń aıtýynsha, eger qoǵam ókilderi demokratıa týraly aıtqysy kelse, olardyń oı-pikirleri men ustanymdary dáıekti bolýy tıis.

"Maǵan baqylaýshylar jınalysynyń ótetini týraly baspasóz habarlamasy keldi. Aıtylǵan ýaqytynda ótetin jerine bardym. Alaıda, bul azamattar meniń keletinimdi kútpegen. Ózderiniń ǵana málimdemelerin jasap, ózgeniń pikirine qulaq aspaýǵa tyrysty. Bizdiń tarapymyzdan qoıylǵan suraqtarǵa jaýap bermeı, úzildi-kesildi qarsylyq bildirýge tyrysty. Jınalys bitpeı jatyp, zaldan shyǵyp ketýimizdi talap etti. Nátıjesinde sıasy óship qalatyn qalam týraly baıandady. Bul beınejazbanyń o basta durys túsirilmegenin aıtqym keledi. Keıbir saılaý ýchaskelerinde búlletender qap-qabymen jáshikke salyndy degen oılar aıtyldy. Ondaı beınejazbalardyń qanshalyqty shyndyqqa janasatyny belgisiz. Ol búlletender qaı kandıdatqa berildi. Ol da túsiniksiz", – dedi Qazbek Shaıh.

«Amanat» azamattyq platformasy shtabynyń táýelsiz baqylaýshysy Aleksandr Belánov ta ótkizilgen jıynnyń zańǵa qaıshy keletin tustary kóp ekenin jasyrmady.

"Baqylaýshylar jıyny ótetini týraly habarlamany men de aldym. Pikir almasý, saılaýǵa qorytyndy jasalady degen úmitpen keldim. Alaıda, aıadaı ǵana tar bólmege tilshi, bloger, birqatar qoǵam ókilderin jınap alǵan. Aıaq alyp júrý bylaı tursyn, demalýǵa múmkindik joq. Uıymdastyrýshylar  bizdiń jınalysqa qatyspaı, dereý ketýimizdi talap etti. Qarsylyǵymdy bildirip edim, tyńdaǵan da joq, shyǵaryp jiberdi", – deıdi  Aleksandr Belánov.

Onyń aıtýynsha, jıynda sóz alǵandardyń sózderi uıqaspaıdy.

"Máselen, bizdi táýelsiz baqylaýshy retinde qoǵamdyq uıymdar saılaıdy. Al, bulardyń qaıdan shyqqany belgisiz. Bastapqyda ózin Qosanov shtabynyń jetekshisimin dep tanystyrǵan Serik Ábishev keıinnen bul laýazymnan saılaýǵa deıin ketip qalǵanyn málimdedi. Taǵy bir baqylaýshy ózin qarapaıym azamat dep tanystyrdy", – dep jalǵastyrdy sózin A.Belánov.

«Amanat» azamattyq platformasynyń ókilderi zaldan shyǵarylǵan soń jıyndy uıymdastyrýshylar bul azamattardyń saılaý kezinde óz mindetterin durys oryndamaǵanyn aıtyp, jala japty.

Jalpy, jıynda saılaýǵa qatysty aıtylǵan málimetterdiń ras-ótirigi belgisiz, ashyq kúıinde qaldy.

Esterińizge sala keteıik, elimizdegi jalǵan aqparat taratqan árbir azamat Qazaqstan zańdarymen qylmystyq jaýapkershilikke tartylady.