Medısınalyq kómek kórsetýdiń qandaı tásilderi qajet ekenin Densaýlyq saqtaý mınıstri Úkimet otyrysynda aıtty, dep habarlaıdy Qamshy.kz aqparat agenttigi QazAqparat silteme bere otyryp.

«Elbasynyń tapsyrmasy boıynsha tegin medısınalyq kómektiń kepildik berilgen kóleminiń (tegin medısınalyq kómek) jańa úlgisi jáne mindetti áleýmettik medısınalyq saqtandyrý (medısınalyq saqtandyrý júıesi) júıesindegi medısınalyq kómek paketi ázirlendi. Olar 2020 jyldyń qańtarynan bastap qoldanysqa enedi. Bul jumys BUU turaqty damý maqsattaryna sáıkes júrgizildi. Jalpy tanylǵan álemdik densaýlyq saqtaý standarttary densaýlyqqa baılanysty qarjylyq táýekelderden qorǵaýdy, sondaı-aq sozylmaly ınfeksıalyq emes aýrýlardy basqarýdy qamtamasyz etetin medısınalyq-sanıtarlyq qyzmettermen jappaı qamtýdy aıqyndady», - dedi Eljan Birtanov Úkimet otyrysynda.

Mınıstrdiń aıtýynsha, búdjettik shyǵyndardyń jyl saıyn ulǵaıýyna qaramastan, tegin medısınalyq kómekti qarjylandyrýdyń  qazirgi deńgeıi halyqtyń medısınalyq kómekke ósip kele jatqan suranysyn qamtamasyz ete almaı jatyr. Mınıstrliktiń baǵalaýynsha tegin medısınalyq kómekti qarjylyq qamtamasyz etý tapshylyǵy tek 2017 jyly 363 mlrd teńgeni quraǵan.

«Sonyń saldarynan bul baǵyttaǵy shyǵyn 2017 jyly densaýlyq saqtaýdyń jalpy shyǵystarynyń 42 paıyzyna (678 mlrd tg) jetti. Bul Dúnıejúzilik densaýlyq saqtaý uıymy usynǵan shekti deńgeıden eki ese joǵary», - dedi Eljan Birtanov.

Mınıstr atap ótkendeı, joǵaryda aıtylǵandardy eskere otyryp, halyqty medısınalyq qamtamasyz etýdiń úsh deńgeıli júıesi ázirlengen. Birinshi deńgeı - QR barlyq azamattaryna, oralmandar men turaqty turatyn sheteldikterge memlekettik búdjet esebinen tegin medısınalyq kómek berýdi qamtamasyz etedi. Bul paket tegin medısınalyq kómektiń mynadaı túrlerin qamtıdy: tirkelgen jeri boıynsha medısınalyq-sanıtarlyq alǵashqy kómek, jedel kómek, sanıtarlyq avıasıa jáne shuǵyl stasıonarlyq kómek,  dári-dármekpen qamtamasyz etýdi qosa alǵanda, áleýmettik máni bar aýrýlar men negizgi sozylmaly aýrýlar kezinde medısınalyq kómektiń tolyq spektri. Ekinshi deńgeı - saqtandyrylǵan halyq úshin medısınalyq saqtandyrý júıesi paketi - ol tegin medısınalyq kómekten tys qyzmetterdi qamtamasyz etip, aýrýlardyń keń spektri boıynsha konsýltasıalyq, dıagnostıkalyq, josparly stasıonarlyq kómek jáne tegin dári-dármekpen qamtamasyz etý, stasıonardy almastyratyn kómek, ońaltý jáne qalpyna keltirý emin qamtıdy. Úshinshi deńgeı - bul tegin medısınalyq kómek jáne medısınalyq saqtandyrý júıesiniń paketterine kirmeıtin medısınalyq qyzmetter. Olar aqyly nemese erikti medısınalyq saqtandyrý esebinen usynylady.

«Medısınalyq kómek paketteriniń jobalaryn sarapshylar egjeı-tegjeıli pysyqtady. Olar óńirlerdiń densaýlyq saqtaý basqarmalarymen, múddeli memlekettik organdarmen, «Atameken» Ulttyq kásipkerler palatasymen kelisildi. Densaýlyq saqtaý mınıstrliginiń qoǵamdyq keńesinde qaralyp, maquldandy. Bekitýge usynylatyn medısınalyq kómek paketterin qoldaýdy jáne 2020 jyldan bastap mindetti áleýmettik medısınalyq saqtandyrý júıesin turaqty engizý úshin barlyq qajetti sharalardy iske asyrýdy qoldaýyńyzdy suraımyn», - dedi Eljan Birtanov.