"Halyq komýnıseri" fraksıasynyń depýtattary múgedek bala tárbıelep otyrǵan ata-ananyń zeınet jasyn tómendetýdi usyndy dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Depýtat Magerram Magerramovtyń aıtýynsha, osy sanattaǵy otbasylarǵa arnaıy mártebe berý kerek. Sóıtip, zeınet jasyn tómendetip, jumys isteıtin ata-analarǵa taǵy birqatar jeńildik bergen durys.

"Biz múgedek balany tárbıelep otyrǵan ata-ananyń zeınet jasyn tómendetýdi usynamyz. Sondaı-aq, ata-ananyń bireýin jumystan erte jiberý máselesin qarastyrǵan jón. Sebebi múgedek balaǵa táýlik boıy qaraý qajet. Oǵan biraz kúsh-jiger ketedi. Psıhologıalyq júkteme de az emes", - dedi Magerramov májilistiń jalpy otyrysynda.

Fraksıa depýtattary qamqorshylyqty rásimdeý tártibin de jeńildetý kerek dep sanaıdy. Óıtkeni qazirgi kezde bul prosedýralarǵa 9 aıǵa deıin ketedi. Osy ýaqyttyń ishinde eshqandaı qarjylaı kómek berilmeıdi. Ondaıda tolyq emes otbasylar qatty qınalady.

Qazaqstanda áıelderdiń zeınet jasyn 2027 jylǵa deıin birtindep 63 jasqa deıin ulǵaıtý josparlanǵan. Degenmen, keıbir áıelderdiń zeınet jasy ózgermeıdi. Olardyń ishinde kópbalaly analar jáne Semeı ıadrolyq polıgonynda turǵan áıelder bar.

Máselen, bes jáne odan kóp balasy bar áıelder 53 jasta zeınetke shyǵa alady. Al Semeı ıadrolyq polıgonynynyń joǵary radıasıalyq qaýpi bar aımaqtarda bes jyldan artyq turǵan áıelderge 45 jasta zeınetke shyǵýǵa ruqsat bar.