Atyraýda 20 tonna gýmanıtarlyq júk jınaldy. Onyń ishine azyq-túlikter, jeke gıgıena quraldary jáne birinshi kezekte qajetti zattar kiredi, dep habarlaıdy Qamshy.kz aqparat agenttigi Atyraý oblysynyń Óńirlik komýnıkasıalar qyzmetine silteme jasap.

«Dına» saýda ortalyǵy dırektorynyń aıtýynsha, munaıly óńirden alǵashqy gýmanıtarlyq júk búgin, ıaǵnı 25 maýsym kúni attanady. Kómekke saýda ortalyǵynan jalǵa alyp otyrǵan 100-den astam kásipker qatysty.

"Atyraý oblysy ákimi Nurlan Noǵaev Arys qalasyndaǵy tótenshe jaǵdaı saldarynan zardap shekkenderdi qoldaýǵa jáne turǵyndarǵa kómek kórsetýge shaqyrdy. Biz "Arys, biz birgemiz" atty jalpy qazaqstandyq aksıaǵa qatysýǵa sheshim qabyldadyq. Osynyń arqasynda 20 tonna qajetti júk jınaldy. Qazir biz barlyq júkterdi tıep jatyrmyz. Jaqyn arada gýmanıtarlyq kómek jóneltiletin bolady. Budan bólek, BAQ jarıalaǵan bank shottaryna qarajattaryn aýdarýda",- deıdi «Dına» saýda ortalyǵynyń dırektory Nurlan Táýekel.

Aıta keteıik, 24 maýsym kúni tańerteń Arys qalasynda áskerı bólimniń qoımasynda jarylys oryn alǵan bolatyn. Qoımalarynyń birinde órt bastalyp, artynsha jarylysqa ulasqan. Barlyq turǵyndar evakýasıalanyp, jaqyn mańdaǵy eldi mekenderge jetkizildi.