Halyqaralyq «Maǵjan Jumabaı» atyndaǵy ádebı birlestiktiń dástúrli ýnıversıtetaralyq aıtysy óz máresine jetti. Túrki halyqtarynyń yntymaqtastyǵyn jáne elimizdegi, álemdegi bilim júıesin sóz etetin aıtystyń ár jylǵy jeńimpazdarynyń qatarynda ál-Farabı atyndaǵy QazUÝ, Qaraǵandy memlekettik ýnıversıteti, Súleımen Demırel ýnıversıtetteri kóringen edi. Bıylǵy áýen jyldaǵydan ózgerek boldy. Muny endi ret-retimen baıan eteıik.

Halyqaralyq Súleımen Demırel ýnıversıtetiniń Qaskeleńdegi jańa korpýsynda bastalǵan dúbirli dodaǵa respýblıkamyzdyń ár aımaǵynan, atap aıtqanda  Taraz, Semeı, Shymkent, Astana, Almaty, Oral, Aqtaý qalalarymen qatar Qytaı halyq Respýblıkasy Kúıtiń qalasynan da stýdent aqyndar keldi. Bul aıtysqa Dáýletbek Baıtursynuly, Aqedil Toıshan bastaǵan qazylar alqasy tórelik etti.

Jas aqyndar sahnada kórermen tańdaýy boıynsha jasyryn konvertter arqyly juptalyp, iriktelip eń myqty aqyndar júldeli oryndarmen marapattaldy. Bul aıtysty Súleımen Demırel ýnıversıteti "Maǵjan" ádebıet jáne óner birlestigi men QR Prezıdent qory birlesip uıymdastyryp,  aıtystyń júlde qoryna 700 myń teńge bólindi. Aıtystyń bas júldesi QHR-dan kelgen jas aqyn Erlan Amanjolulyna buıyrdy. Birinshi júldeni de Qytaıdan kelgen stýdent qandasymyz, kórermen kózaıymyna aınalǵan Anargúl Bádelhan ıelendi (Galaxy Tab2).

Al, ekinshi oryndardy Eýrazıa ýnıversıtetinen kelgen Syrym Áýesqan men Súleımen Demırel ýnıversıtetiniń kenjesi Altynbek Ibragımov ózara bóliske saldy. Ekinshi oryn júldegerlerine  sońǵy úlgidegi Noýtbýkter syıǵa tartyldy.

Aıtystyń úshinshi júldeleri Kúıtiń qoldanbaly-tehnıkalyq ınstıtýtynyń qos túlegi Arzygúl Qaıymbekqyzy men Núrzıa Asqabulqyzyna buıyrdy.  Aıtys qortyndysynda sóz alǵan Prezıdent qorynyń basshysy Erkin Dáýletuly: " Qazirgi tańda tanylmaı júrgen jas daryndar jetkilikti. Súleımen Demırel ýnıversıtetiniń bul ıgi bastamasy ulttyq ónerdi dáripteýdi, talantty aqyndarǵa qoldaý kórsetýdi kózdeıdi. Sondyqtan da, Bundaı bastamaǵa biz árdaıym oń kózqarastamyz,"- dep  uıymdastyrýshylar men jas aqyndarǵa óz rızashylyǵyn bildirdi.

Osylaısha S.Demırel ýnıvesıtetinde uıymdastyrylǵan  halyqaralyq aıtysqa myńnan tulpar bolyp iriktelip kelgen 16 aqynnyń altaýy aıtys báıgesin qanjyǵalaryna baılap qaıtty. Quralaqan qaıtqan aqyn bolmady. Aıtysqa qatysqan barlyq aqyndarǵa arnaı alǵys hattar men sertıfıkattar tapsyryldy.

Aıtystyń uıymdastyrý komıtetiniń tóraǵasy Ulan Erkinbaı: «Súleımen Demırel ýnıversıtetinde jyl saıyn dástúrli túrde uıymdastyrylyp kele jatqan sóz óneriniń dúbirli dodasy udaıy  óz jalǵasyn tabary sózsiz. Keler jylǵy saıysqa álemdegi barlyq qandastarymyzdy jáne túrki halyqtarynyń ishinde qazaqtyń tól ónerine týystas osy janrdy tiriltip júrgen ónerpazdardy qatystyramyz. Jalpy bizdiń maqsat – babalar qundylyǵyn arqalaǵan aıtysymyzdy halyqaralyq deńgeıde nasıhattaý» dedi.

Áıgerim Ábisheva