Qasym-Jomart Toqaev rásim kezinde syılyq laýreattary men grant ıelerin, alǵys jarıalanǵan shyǵarmashylyq ujymdardy jáne barlyq jýrnalıser qaýymyn kele jatqan kásibı merekelerimen quttyqtady dep habarlaıdy Qamshy.kz aqparat agenttigi Aqorda saıtyna silteme jasap.

"Buqaralyq aqparat quraldary - jańalyqtyń jarshysy. El ishindegi jáne álemdegi oqıǵalardan halyqqa shuǵyl ári shynaıy aqparat taratý - Sizderdiń kásibı eńbekterińiz. Sondyqtan, Sizderdiń qoǵamdyq mańyzy zor qyzmetterińizge biz árqashan qurmetpen qaraımyz, baǵalaımyz. Meniń tapsyrmam boıynsha Úkimet arnaıy qaýlymen Qazaqstan jýrnalıseriniń kásibı merekesin bekitti", - dedi Prezıdent.

Qasym-Jomart Toqaev ozyq tehnologıa zamanynda medıa salasynyń múmkindikteri óte aýqymdy ekenin atap ótti. Memleket basshysy jýrnalısıkanyń jańa dáýirinde ǵalamtor jelisi men áleýmettik jelilerdiń aıryqsha róline toqtalyp, aqparattyń ashyq, jedel jáne qoljetimdi bolýy jetistiktiń basty ólshemderine aınalǵanyn aıtty. "Memlekettiń áleýetin nyǵaıtý, ekonomıkany damytý, azamattardyń turmys sapasyn arttyrý - búginde elimizdiń aldynda turǵan mańyzdy mindetter. Otandyq medıa-qaýymdastyqtyń syndarly negizde uıysýy, jýrnalıserdiń belsendi azamattyq ustanymy, olardyń kásibı deńgeıi jáne ádildigi - aqparattyq keńistiktegi tabysty jumystyń negizgi sharttary. Memleket óz tarapynan BAQ-qa qoldaý kórsete beredi", - dep atap ótti Prezıdent. 

"Jas Órken" JSHS bas dırektory Júsipbek Qorǵasbekke, "Komsomolskaıa Pravda - Qazaqstan" gazetiniń bas redaktory - Vıktor Kıanısaǵa, "Ana tili" gazetiniń bas redaktory - Janarbek Áshimjanǵa, "Astana" telearnasynyń redaktory - Jaına Jaqsylyqovaǵa Memleket basshysynyń Ókimimen syılyq taǵaıyndaldy. Granttar "Habar 24" telearnasynyń tilshisi - Raýan Myńbaevqa, "Qazaqstan" teleanasyndaǵy "Másele" taldamalyq baǵdarlamasynyń júrgizýshisi Nartaı Sársenǵalıevke, "Qazaqstan" teleradıokorporasıasy Mańǵystaý oblystyq fılıalynyń shef-redaktory Asem Sartbaevaǵa tapsyryldy.

"Egemen Qazaqstan", "Ekspress K", "Znamá trýda" jáne "Shalqar" radıosy shyǵarmashylyq ujymdaryna Qazaqstan Respýblıkasy Prezıdentiniń alǵysy jarıalandy. Qasym-Jomart Toqaevtyń Alǵys hattaryn "Aıqyn" gazetiniń bas redaktory Nurtóre Júsip, "Habar" telearnasy taldamalyq baǵdarlamalar bóliminiń shef-redaktory Aleksandr Trýhachev, "Qazaqstan" telearnasynyń júrgizýshileri Qymbat Dosjan jáne Dana Nurjigit, "Habar 24" telearnasynyń shef-redaktory Shalqar Qojaev, "Qazaqstan" telearnasynyń aqparattyq-saraptamalyq baǵdarlamalar dıreksıasynyń dırektory Erlan Atambaı, "Lıter" gazeti bas redaktorynyń orynbasary Janna Oıshybaeva, "KTK" telearnasynyń bas dırektory Elmıra Djamılova, sondaı-aq "Qazaqparat" HAA jáne "Jetisý" telearnasy aldy.

Qazaqstan-Reseı jáne Qazaqstan-Qytaı yntymaqtastyǵyn nyǵaıtýǵa belsendi atsalysqany úshin Búkilreseılik memlekettik televızıa jáne radıo habarlaryn taratý kompanıasy men "CCTV" Halyqaralyq telearnasy Qazaqstan Prezıdentiniń Alǵys hattarymen marapattaldy. Memleket basshysynyń atynan elimizdiń barlyq óńirlerine jiberilgen alǵys hattar úzdik jýrnalıserge saltanatty túrde tabys etiletin bolady.