Aqparat jáne qoǵamdyq damý mınıstri Dáýren Abaev Shymkent qalasyna evakýasıalanǵan arystyqtardyń sherýi týraly pikir bildirdi dep jazady Qamshy.kz aqparat agenttigi.

Aıta ketý kerek, búgin tús áletinde Arys qalasynan evakýasıalanǵan turǵyndar bılikten úı men jer telimin talap etip, ruqsat etilmegen mıtıńke shyqqan-dy.

–Meniń oıymsha, bul – emosıanyń alǵa shyǵýynyń jemisi. Sanasy ashyq azamattar barlyǵyn basynan baǵamdaıdy. Oblys ákimi men qala ákimi jıylǵandarmen jedel kezdesip, jaǵdaıdy túsindirdi. Olar erteń-aq, óz qalalaryna qaıtady. Úılerin jańadan salyp, jóndep beredi. Meniń oıymsha, bul qala burynǵysynan áldeqaıda jaqsarady, - dedi mınıstr "Habar" arnasyna bergen suhbatynda.

Onyń aıtýynsha, arandatýshylar men aram nıettiler ashynǵan halyqtyń ashý-yzasyn óz múddelerine paıdalanyp otyr. Qazirgi ýaqytta bul ispen quqyq qorǵaý organdarynyń qyzmetkerleri aınalysýda.

–Tynyshtyq pen ashyq sanany saqtap qalýymyz kerek. Jedel arada bári qalpyna keletinine men kámil senemin, - dedi mınıstr.

Abaevtyń aıtýynsha, Arys qalasynda oryn alǵan tótenshe jaǵdaıdyń shyǵý sebebi anyqtalyp, kináliler jazasyne alady.

–Aıtatyny joq, beıbit kúnde tóbeńnen ysyldaǵan snaryıadtyń ushýy – jiberilmeýi tıis qatelik. Bılik muny sózsiz túsinedi. Biz – mundaı tótenshe jaǵdaılar oryn alǵan alǵashqy el emespiz, - dedi Abaev.

Belgili derekkózderdegi aqparattarǵa sensek, Arys qalasynyń turǵyndary erteńnen bastap óz úılerine oralady. Al qalaǵa kirýge ruqsat berilgen kúnnen-aq qamkóńil eldiń qamy úshin iske kirisýge bilek sybanyp otyrǵandardyń qarasy qalyń.