QR BǴM-niń qyzmetkerleri tolǵaǵy kelgen júkti áıelge kómektesti. Bul oqıǵa jańaǵy áıel basqa turǵyndarmen birge Arys qalasyn tastap bara jatqanda bolǵan. Tolǵatyp jatqan áıeldi jol ústinde kezdestirgen qyzmetkerler ony bala týýǵa jaǵdaıy bar jerge jetkizdi. Nátıjesinde bári de sátimen aıaqtalyp, sábı (qyz bala) dúnıege keldi. Júkti áıelge kómek kórsetkenderdiń ishinde bizdiń jerlesimiz, Atyraý munaı jáne gaz ýnıversıtetiniń dosenti Balbópe Ótenova da boldy.
- Arys qalasyndaǵy № 1 mekteptiń bazasynda Ulttyq biryńǵaı test tapsyrý ortalyǵy bar. Barlyǵy onda eki lek ótken – 21 jáne 23 maýsymda, árbir lekten soń apelásıa bolady. 24 maýsym kúni 12 adamnan turatyn komısıa apelásıaǵa daıyndalyp jatqan. Tańerteńnen jarylystar bolyp, adamdardy shuǵyl túrde qaladan shyǵara bastady-dep áńgimeleıdi B.Ótenova.
Jarylys bolǵanda, oqytýshylar mektepte júrgen bolatyn. Birazdan soń turǵyndar apyl-ǵupyl qaladan kete bastady.​
- Biz qalamen tanys emespiz, qaıda baratynymyzdy da bilmeımiz. Shyǵa beriste turǵan mashınalar balalar men eresekterdi alyp ketip jatty. Jaıaý júrip kele jattyq, áıteýir bir jas jigit toqtap, taıaýdaǵy aýylǵa jetkizip tastady. Sol jerde júkti jas áıeldi kórdik – akýshermen birge kólik kútip otyr eken. 41-shi aýylǵa deıin birge jetip, alǵashqy kezdesken, beıtanys adamdardyń úıine toqtadyq. Osy otbasyna alǵysymdy bildirgim keledi. Úı ıesi áıel bólme bólip, taza tósek, jaıalyq berdi, sýmen qamtamasyz etti. Biz de barynsha kómektestik. Jas ana qyz bala týdy. Sábı iri eken, biraq tájirıbeli akýsherdiń arqasynda bári de oıdaǵdaı boldy. Úı ıeleri bar jaǵdaıdy jasap, jedel járdem kelgenshe barynsha kómektesti,-dedi Balbópe Ótenova.​
Aman –esen bosanǵasyn Kenje atty jas ananyń (bul – onyń ekinshi balasy) týǵandarymen, joldasymen, enesimen habarlastyq.
- Kenjemen sóıleskenimizde, eger ul týsa, qıyn kezeńde kómektesken júrgizýshiniń esimin beremiz degen. Qyz týǵasyn, jańaǵy júrgizýshiniń anasynyń qurmetine Kamıla dep atady. Men sábıdiń kindigin kestim. Ózimniń eki qyzym bar, endi bul bala da men úshin týǵanymdaı bolmaq. Baılanysta bolyp, onyń taǵdyrynyń qalaı bolaryn qadaǵalap otyramyn. Jas anamen birneshe ret tildestim, bári de jaqsy,- dep atap ótti B.Ótenova.​ ​
Ol ózin erlik jasadym dep eseptemeıdi. Desek te, osyndaı syn sátte abdyramaı, basqaǵa kómektesý árkimniń qolynan kele bermeıtini haq.
Eske sala keteıik, budan burynyraq Bilim jáne ǵylym mınıstri Asqat Aımaǵambetov Balbópe Ótenovany jáne onyń áriptesteri Janat Nurjumanova men Shaızy Doskeevany qabyldap, batyrlyq tanytyp, kómek kórsetkenderi úshin mınıstrliktiń alǵysymen marapattaǵan bolatyn.​ ​ ​ ​ ​