Arystaǵy aǵaıynnyń úreıin týǵyzǵan apattan keıin neshe túrli jaǵdaılar aıtylyp jatyr. Al arystyq polıseıdiń úıin jarylystan qorǵap qalǵan jylqynyń tarıhy týraly Qamshy.kz aqparat agenttigi aıtady. 

Arys qalasynda turatyn polısıa qyzmetkeri Baǵlan Jarylqasymov úıiniń janynda qorada turǵan jylqysynyń quıryǵyna baılanyp qalǵan snarád týraly aıtyp berdi. Týra tússe, úıdiń kúlin kókke ushyratyn snarádtan ony jylqysy saqtap qalǵan kórinedi.

"Ne derimdi de bilmeımin. Biraq álgi snarád meniń atymnyń quıryǵyna oralyp qalypty. Múmkin, meniń atym – meniń úıimdi saqtap qalǵan perishtem shyǵar", - dep aǵynan jaryldy polısıa qyzmetkeri.

Polısıa qyzmetkeriniń aıtýynsha, úıine qaıtyp oralǵan kezde qoranyń ishindegi jylqynyń quıryǵyna oralyp turǵan snarádty kórgen. Ol snarádty kóre sala saperlarǵa habar bergen.

Polısıa qyzmetkeri jarylys bolǵan kúndi eske alyp, otbasyn baýyryna tabystaǵan kúıi qaıta qyzmetke oralǵany týraly aıtyp berdi.

"Biz jol boıymen qashyp bara jattyq. Bizben birge kórshiler de qashty. Báriniń kózinde qorqynysh boldy. eshkimniń ólgisi joq. Otbasymdy qala syrtyna deıin shyǵardym da, áriptesterimmen birge qyzmetke oraldym. Turǵyndardy evakýasıalaýǵa kúsh saldyq", - deıdi Baǵlan.