Pir Beket Ata Aqmeshitiniń ımamy, qalamger, Islam qajy Myrzabekulynyń «Ábilqaıyr han men Bopaı hanym» týraly jazylǵan kitabynyń ekinshi basylymy jaryq kórdi. Jańa týyndynyń tanystyrylymy  ǵalymdar, kitaphanashylar, óńirlik saraptaý keńesiniń músheleri, oqyrmandar qatysýymen ótti.

-Orys ádebıetteri Ábilqaıyrdyń Reseıge jazǵan hatyn orys ǵalymdary burmalap, qate aýdarǵan. Semeı ýnıversıtetiniń oqytýshysy aýdarma jasap, batpaqtan ashyp aldy. Men ony kitapqa engizdim. Bopaı hanym orys patshaıymdary Elızaveta, Annamen terezesi teń bolǵan, óziniń móri bolǵan. Osylardy zerttep, arhıvte bolyp, nıettendim. Aqtaýǵa kelip, taratýdamyn, deıdi avtor Islam Myrzabekuly.

Bopaı hanym el basqarý isinde Ábilqaıyr hannyń senimdi ári aqyldy serigi bolyp, ishki jáne syrtqy máselelerdi sheshýge atsalysyp, dıplomatıalyq qatynastardy rettep otyrǵan.  Onyń azamattyq, qaıratkerlik tulǵasy, asyl ana retinde tárbıelik ónegesi de - urpaqqa úlgi. «Rýhanı jańǵyrý» baǵdarlamasy aıasynda kitaptyń 500 danasy shyǵarylǵan.  Avtor sharada oblystyq, aýdan-qalalardyń ortalyq kitaphanalaryna, Islam Myrzabekulynyń kitaphana qoryna arnaıy ózi tabystady. Ári qaraı, Aqtóbede, Oralda, Atyraýda tanystyrylym bolmaq.

-Ábilqaıyr han týraly qanshama kitap boldy. Bopaı hanym týraly bul alǵashqy kólemdi shyǵarma. Islam Myrzabekuly óte izdanympaz, óte jaqsy jazǵan, deıdi oqyrman Salamat Nuruly.