Jazýshy Dýman Ramazan myrzanyń jón-josyqsyz, baılam-baǵdarsyz SHQO ákiminiń orynbasary Jaqsylyq Omarǵa shúıligip, búkil eldi dúrliktirgenine tańyrqap otyrmyn. Ózine tikeleı habarlasyp, sebebin suraýdyń ornyna, shoý jasap, taqyrybyn aıǵaılatyp qoıyp, týra bir halyq jaýyn tapqandaı attandaǵanyna qarap: "Óz múddesi úshin aıanbaıtyn erler 37 jyldarmen bitpepti ǵoı" degen oıǵa keldik. Eń sońynda kelistik, túsinbestik bolypty deıdi. Sol túsinbestiktiń aldyn alý úshin jalpaq jurtqa jarıa salý kerek pe edi? Áýeli, osy bizde dramatýrgıanyń da naýqandyq sharaǵa aınalyp bara jatqanyna qynjylamyn. Músháıralardy pálenshe jyldyqtar men merekelerdiń qurmetine arnap, has óleńniń qadirin qashyryp edik. Endi sol dert dramatýrgıaǵa da jetipti. "Qazaq handyǵynyń 550 jyldyǵy" degen jeleý jaqsy boldy. "Kereı-Jánibek", "Qabanbaı-Bógenbaı", "Shapyrashty Naýryzbaı" dep at qoıyńyzda, dıalogtardan turatyn 20 bettik pesańyzdy jóneltińiz (Bizdiń kóptegen ádebıetshiler drmatýrgıany dıalogtardyń tizbegi dep túsinedi). Sosyn attandańyz, menikin qoımaı jatyr, qazaqty qorlap jatyr dep. Shyn dramatýrgıa ýaqyt ıirimine maltyqpaıtyn bolýy kerek. Tarıhı oqıǵalardy sahnalaý, kórkem sóz júlgesine túsirý ádebıet emes, qaıta tarıhı oqıǵalardan týyndaǵan bolmysty, onyń búginge yqpalyn kórkem mátinge aınaldyrý - ádebıet! Biz tarıhı oqýlyqtardaǵy derekterdi jınaqtap, kórkem shyǵarma jazdyq dep júrmiz. Ádebı sananyń áli de keńestik keńistikte turǵandyǵynyń bir kórinisi osy. Bizdegi tarıhı shyǵarmalardyń taqyrybyna qarap-aq, ne aıtqysy keletinin bilip turasyń...

Toqtaráli Tańjaryq, facebook