Joǵary sot tóraǵasy Jaqyp Asanov kezekten tys prezıdent saılaýy kezindegi sot jumysy týraly, oryn alǵan zań buzýshylyqtar jaıly tarqatyp aıtyp berdi dep jazady Qamshy.kz aqparat agenttigi.

"Saılaý naýqanynda sotqa tek baqylaýshylar ǵana emes, prezıdenttikke kandıdattar, senimdi ókilder, qoǵamdyq uıymdar da shaǵym túsirdi. Búletenderdi qate taratý faktisi boıynsha 26 ákimshilik is qozǵalyp, sotqa deıin jetti", - dedi Jaqyp Asanov sot júıesi jumysyn qorytyndylaǵan otyrys barysynda.

Onyń aıtýynsha, túsken aryz-shaǵymdar nátıjesinde saılaý komıtetteriniń birneshe múshesi jaýapqa tartylyp, aıyppul arqalaǵan.

"Biz olarǵa zań buzýshylyq áreketi úshin aıyppul saldyq. Tipti, olardyń arasynda tóraǵalar da bar edi", - dedi ol.

Sondaı-aq, saılaý kezinde sotqa usynylǵan aryz-shaǵymdardyń birshamasy qaıta qaraýǵa jiberilipti.

"Sotqa túsken barlyq aryz-shaǵym sany – 67. Biraq biz olardyń birazyn qaıta qaraýǵa jiberdik. Óıtkeni, olardyń formasy Azamattyq kodeks talaptaryna qaıshy keldi. Keıde avtorlar óz aty-jónderin kórsetpegen, keıde aryz túsirgen azamattyń atyn kórsetpegen. Sondaı-aq, baqylaýshymyn dep jazylǵan aryz-shaǵymdarda zań talap etetin qujattar joq", - dep túıdi Joǵary sot tóraǵasy.