Jambyl oblysy Shý aýdanynda taǵy bir úshem dúnıege keldi. Bundaı jaǵdaı atalǵan aýdanda alǵash ret bolyp turǵan joq. Máselen ótken jyly ǵana Shý aýdanynda úshemderdiń dúnıege kelgenin kóptegen BAQ súıinshilep jazǵan. Endi mine, dál osyndaı qýanysh bıyl da qaıtalanyp otyr. Naqtyraq aıtsaq, aýdan ortalyǵynan shalǵaı ornalasqan Dalaqaınar aýyldyq okrýginiń turǵyny Antonına Antıpova shekesi torsyqtaı úsh uldy dúnıege ákeldi. Erli-zaıyptylar uldaryna Andreı, Danıl jáne Artem dep esim bergen.

Úshemderdiń anasynyń aıtýynsha, ol «úsh birdeı uldy dúnıege alyp keletinin aldyn ala bilipti».

«Júktiliktiń sońǵy aılarynda aýrýhanadaǵy dárigerler úshem bolatynyn aıtqan edi. Áýelgide tańyrqap qalǵanymyz da ras. «Qansha maly bolsa da, baı qýanar egizge» degendeı, bunyń bizge berilgen úlken syı ekenin ańǵardyq. Bosanatyn ýaqyt jaqyndaǵanda aýdanymyzdyń aq halattylary Taraz qalasyndaǵy perınataldyq ortalyqqa jedel-járdem kóligimen jedel jóneltti. Shúkir, náresteler aman-esen ómirge keldi. Andreı 2 keli 300 gram, Danıl 1 keli 900 gram, al Artem 2 keli 300 gram bop týyldy. Qazir úsheýiniń de densaýlyǵy jaqsy», - deıdi Antonına.

Osylaısha, kúni keshe ǵana tórt birdeı qyzdy tárbıelep otyrǵan Antonına bir-aq kúnde altyn alqa ıegeri atanyp shyǵa keldi. Ózi orys ultynan bolǵanymen, joldasy Andreı Tompa vengr ultynyń ókili. Degenmen, qazaqylyqtyń qaımaǵy buzylmaǵan Dalaqaınar aýylynda turatyn otbasy jergilikti turǵyndarmen týǵan-týysyndaı aralasyp ketken.

 «Ata-anam osy aýylda turyp, osy jerde ómirden ozdy. Men de osynda dúnıege keldim. Qazaq ultynyń baýyrmaldyǵyna áli kúnge tańǵalamyn. Búgin de qoldarynan kelgenshe qaýym bolyp kómek qolyn sozýda. Aýyldastaryma alǵystan basqa aıtarym joq», - deıdi Andreı Tompa.

Aýyzbirshiligi men yntymaǵy qatar júretin aýyl turǵyndary erli-zaıyptylarǵa qoı, eshki, sıyr syndy tórt túliktiń túr-túrin shama-sharqyna qaraı jınap berse, aýyldaǵy ákimshilik, mektep, balabaqsha jáne dárigerlik ambýlatorıa ujymy 200 myń teńge kóleminde qarjy jınap bergen. Budan bólek, jeke-jeke syılyq jasap, kómek qolyn sozǵan turǵyndar da jeterlik. Óz kezeginde erli-zaıyptylar aýdan basshylary men aýyl turǵyndaryna óz rızashylyqtaryn bildirip, alǵystaryn aıtyp jatyr.

Shapaǵat Qonysbaı