Búgin Almaty qalasynda mánerlep syrǵanaýdan Qazaqstan Respýblıkasynyń belgili eńbek sińirgen  sport sheberi Denıs Tendi eske alý sharasy boldy dep habarlaıdy Qamshy.kz aqparat agenttigi. 

Eske alý jıyny osydan bir jyl buryn Denıs Ten qaıtys bolǵan Qurmanǵazy men Baıseıitova kósheleriniń qıylysynda boldy. Dál osy jerde sport sheberine arnalǵan eskertkish ornatylǵan bolatyn. 

"Qurmetti qaýym, búgin biz elimizdiń belgili azamaty Denıs Tendi eske alý rásimine jınaldyq. Denıs qamshynyń sabyndaı qysqa ǵumyrynda óshpes iz qaldyryp, óz esimin sport tarıhynda altyn árippen jazyp ketti", - dedi jıynǵa qatysqan Almaty qalasy ákiminiń orynbasary Erjan Babaqumarov.

Denıs Tendi eske alýǵa qala turǵyndary, qoǵam qaıratkerleri, sport sheberleri qatysty.

"Denıstiń qandaı adam bolǵanyn aıtyp túsindirip jatýdyń qajeti joq. Óıtkeni Denıstiń qandaı adam bolǵanyn barlyǵy biledi. Eger onyń qandaı ekenin eshkim bilmese, bir jyl buryn Denıspen qoshtasýǵa halyq túgel kelmes edi. Bul onyń qandaı adam bolǵanynyń kórsetkishi. Men úshin mánerlep syrǵanaý Denıstiń obrazymen sıpattalady. Ol bizdiń adamymyz boldy. Ol ónerdiń adamy boldy. Mánerlep syrǵanaýdan ózge mýzykamen, kınomen áýestendi. Ózin jan-jaqty qalyptastyrdy. Sondyqtan, men oǵan barlyǵy úshin alǵys aıtqym keledi. Biz ony eshqashan umytpaımyz. Ol bizdiń máńgi júregimizde", - dedi ánshi Álı Oqapov.  

Eske alý jıynynyń sońynda Denıs Tenniń eskertkishine gúl shoqtary qoıyldy. 

"Ómirdi shyn súıemin. Ata-anamdy jaqsy kóremin. Adamdardy jaqsy kóremin. Súıgendi jaqsy kóremin. Sonymen bóliskim keledi. Iaǵnı, ózim emes, somdaǵan keıipkerim arqyly bólissem deımin. Jıyrma bes jasta álemge basqasha qaraıdy ekensiń", – dep jazǵan edi Denıs Ten 2018 jyldyń 13 maýsymdaǵy sońǵy týǵan kúninde.

Álemge ózgeshe kózqaraspen qaraǵan sport sheberiniń shynaıy mahabbaty halqynyń júreginde máńgilik saqtalmaq.