Jambyl oblysy Moıynqum aýdanynyń aýmaǵynda jol-kólik oqıǵasy saldarynan qaza tapqan polıseılerdiń esimi belgili boldy, — dep habarlaıdy Qamshy.kz aqparat agenttigi Tarazy.kz saıtynyń deregin negizge alyp. 

«Óz mindeterin adal atqaryp, qyzmet babynda qaza bolǵan polısıa maıory Saıat Qosdaýletuly Tleýberdıevke jáne polısıa aǵa serjanty Murat Bazarqululy Bazarqulovqa áskerı qurmet kórsetildi. Moıynqum APB ǵımaratynyń aldynda qyzmet babynda qaza bolǵan mılısıa kapıtany B.Amantaevtiń qurmetine ornatylǵan «Mindet, abyroı, erlik» eskertkishiniń aldynda APB jeke quramy sapqa túzilip, bir mınýt únsizdikten soń qurmet salúty úsh dúrkin atylyp, áriptesterimizdi sońǵy saparǵa shyǵaryp saldyq. Jatqan jeri ımandy, topyraǵy torqaý bolsyn!», — delingen Moıynqum polısıasynyń Instagram jelisindegi paraqshasynda.

Jambyl oblystyq polısıa departamenti baspasóz qyzmetiniń jetekshisi Gúlsara Muhtarqulova joǵaryda kórsetilgen azamattardyń Moıynqum aýdandyq polısıa bólimshesiniń qyzmetkerleri bolǵanyn jáne 13 shildede jumys babynda júrip jol apatynan qaza tapqanyn rastady.

Aıta keteıik, 13 shildede Jambyl oblysy Moıynqum aýdany aýmaǵynda SsanYong markaly avtokólik aýdarylyp, saldarynan Moıynqum aýdandyq polısıa bóliminiń eki qyzmetkeri jáne bir Ózbekstan Respýblıkasynyń azamaty qaza tapty.

Keıinirek, Jelide polıseıler qaza tapqan jol apaty bolǵan jerde túsirilgen sýretter paıda boldy.

Osy is boıynsha sotaldy tergeý sharalary QR QK-niń 345-baby 4-bóligi («Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy») boıynsha júrip jatyr.